पती-पत्नीची गळफास घेऊन आत्महत्या !

कन्नड : तालुक्यातील हिवरखेडा गौताळा येथील तरुण पती-पत्नीने गळफास घेऊन आत्महत्या केल्याची घटना बुधवारी सायंकाळी चार वाजण्याच्या दरम्यान उघडकीस आली.

एकनाथ आप्पासाहेब काळे (वय ३०) व भाग्यश्री एकनाथ काळे (२८) अशी दोघांची नावे आहेत. बुधवारी गौताळा अभयारण्याच्या लांबर्डीच्या खिंडीत गुरे चारण्यासाठी एक गुराखी गेला होता. उग्र वास आल्याने त्याने आजूबाजूला बघितले. तेव्हा जवळच दुचाकी (एमएच २० डीएन ५३५५) उभी दिसली. त्यानंतर मोहाच्या झाडाला पुरुष आणि स्त्री दोघे गळफास घेतलेल्या अवस्थेत आढळले. यामुळे घाबरून त्याने गाव गाठले व ही माहिती तंटामुक्त समितीचे अध्यक्ष संजय जाधव यांना दिली. संजय जाधव यांनी शहर पोलीस ठाण्याला ही माहिती कळविली. माहिती मिळताच पोलीस निरीक्षक रामेश्वर रेंगे, पोलीस उपनिरीक्षक बलभीम राऊत, हेड कॉन्स्टेबल राठोड, पोलीस नाईक गणेश चेळेकर, बरडे यांनी घटनास्थळ गाठले. आत्महत्या केलेले पुरुष व स्त्री हे हिवरखेडा गावातील एकनाथ काळे व भाग्यश्री काळे हे दोघे पती-पत्नी असून त्यांनी एकाच दोरीने गळफास घेऊन जीवन संपविल्याचे तपासांती स्पष्ट झाले. मृतदेह कुजण्यास सुरुवात झालेली असल्याने ही घटना सुमारे तीन दिवसांपूर्वी घडलेली असावी, असा अंदाज पोलिसांनी व्यक्त केला आहे. गावकऱ्यांच्या मदतीने मृतदेह खाली काढून विच्छेदनासाठी ग्रामीण रुग्णालयात नेण्यात आले. पती-पत्नीने आत्महत्या का केली याबाबत उशिरापर्यंत कोणतीही माहिती मिळू शकली नाही.