लग्नसमारंभावरून परतणारी जीप उलटली, दोघांचा मृत्यू

कन्नड-सिल्लोड महामार्गावर नाचनवेलजवळ झाला अपघात

नाचनवेल ( औरंगाबाद ) : कन्नड-सिल्लोड महामार्गावर मंगळवारी रात्री उशीरा झालेल्या भीषण अपघातात भराडी येथील माजी ग्रा.पं.सदस्यासह दोन जणांचा जागीच मृत्यू झाला व इतर  गंभीर जखमी झाले. जीपमधील सर्वजण नाशिक येथून लग्नसमारंभ उरकून भराडीला परतत होते.

रात्री दीडच्या सुमारास कन्नड तालुक्यातील सारोळा व मोहाडीफाट्यादरम्यान तांत्रिक बिघाडामुळे नाशिक येथून परतणारी जीप (MH 20 BC 6623)  उलटली. अपघातानंतर जीप दोन पलट्या घेऊन बाजूच्या शेतात जाऊन थांबली. या अपघातात भराडीचे माजी ग्रा.पं.सदस्य प्रदीपसिंग सुंदरसिंग गौर(वय ५६) व लता शिवसिंग गौर (वय ५०) हे दोघे जागीच ठार झाले. अपघाताची माहिती समजताच पिशोर पोलीस ठाण्याच्या सपोनि कोमल शिंदे, बीट जमादार वसंत पाटील व पोलीस कर्मचाऱ्यांनी घटनास्थळी धाव घेत जखमींना उपचारासाठी तातडीने सिल्लोड येथील रुग्णालयात हलवले. या अपघाताची माहिती सकाळी गावात कळताच भराडीवर शोककळा पसरली.पंचनाम्यानंतर पिशोर पोलिसांत अपघाताची नोंद करण्यात आली आहे.