Lok Sabha Election 2019 : मराठवाड्यात वंचित बहुजन आघाडीच्याही दंडबैठका !

मराठवाड्यातील बहुजन मते वळविण्याचे आव्हान

ठळक मुद्देमराठवाड्यात बहुजन मतांचा आकडा मोठा अनेक मतदारससंघांत तिरंगी लढती बघायला मिळू शकतात

औरंगाबाद : भाजप-शिवसेनेशी लढा असल्याचे सांगत लोकसभा निवडणूक लढविणाऱ्या वंचित बहुजन आघाडीच्या (वंबआ) उमेदवारांनी दंड बैठका सुरू केल्या आहेत. मराठवाड्यातील बहुजन मतांचा टक्का बघता, वंचित आघाडीच्या उमेदवारांमुळे अनेक मतदारससंघांत तिरंगी लढती बघायला मिळू शकतात. मात्र, ही मते वळविण्यात वंचित बहुजन आघाडीला कितपत यश मिळते हे निकालानंतरच कळणार आहे.

वंचित समाज घटकांना केंद्रस्थानी ठेवत अ‍ॅड. प्रकाश आंबेडकर यांनी एआयएमआयएमला सोबत घेत वंचित बहुजन आघाडी स्थापन केली. सुरूवातीपासून चर्चेच्या वर्तुळात असलेली वंचित बहुजन आघाडी पहिल्यांदाच लोकसभा निवडणूक लढवित आहे. मराठवाड्यातील नांदेड, लातूर, उस्मानाबाद, हिंगोली, परभणी, बीड, जालना लोकसभा मतदारसंघातून उमेदवारांची घोषणाही केली आहे. मराठवाड्यातील बहुजन मतांचा आकडा मोठा आहे. मात्र, ही मते वळविण्याचे आव्हान वंचित बहुजन आघाडीसमोर असणार आहे. 

कोठून कोण असेल मैदानात? 
जालना : खा. रावसाहेब दानवे आणि आ. अर्जुन खोतकर यांच्यामुळे चर्चेत असलेल्या जालना लोकसभा मतदारसंघातून डॉ. शरदचंद्र  वानखेडे हे वंचित आघाडीचे उमेदवार आहेत. मागच्या वेळी त्यांनी बसपाकडून लोकसभा निवडणूक लढविली होती.

नांदेड : नांदेडमधून प्रा़डॉ़यशपाल भिंगे यांना उमेदवारी देण्यात आली आहे़ ते उच्च शिक्षित असून, धनगर आरक्षणासह इतर विषयावर त्यांचा अभ्यास आहे. बहुजन समाजातील मतांची संख्या नांदेड जिल्ह्यात मोठी आहे. एकट्या धनगर समाजाचेच दोन लाखांवर मतदार आहेत. त्यात एमआयएमसोबत असल्याने या निवडणुकीत त्यांना किती मते मिळतात, यावर सारे गणित अवलंबून असणार आहे. 

उस्मानाबाद : लोकसभा मतदारसंघातून अर्जुन सलगर यांना उमेदवारी देण्यात आली आहे. बैठका, पथनाट्य आदी माध्यमातून सलगर यांनी मतदारांशी संवाद सुरू केला आहे. 

बीड : लोकसभा मतदारसंघातून प्रा.विष्णू जाधव यांना वंचित बहुजन आघाडीने उमेदवारी दिली आहे. 

लातूर : वंचित बहुजन आघाडीने लातूर लोकसभा राखीव मतदारसंघातून माजी शिक्षणाधिकारी राम गारकर यांना मैदानात उतरविले आहे. काँग्रेस-राष्ट्रवादीशी आघाडी होणार की नाही, याची बोलणी सुरू होती, त्याचवेळी वंचित आघाडीने गारकर यांचे नाव निश्चित केले होते.

परभणी : लोकसभा मतदारसंघातून वंचित बहुजन आघाडीने हैैदराबाद येथील संगणक अभियंता आलमगीर खान अखिल महमद खान यांना उमेदवारी दिली आहे. ते मुळचे परभणी येथील असून, एआयएमआयएमचे प्रमुख खा.असदोद्दीन ओवेसी यांचे ते निकटवर्तीय समजले जातात.

हिंगोली : मोहन राठोड या नवख्या उमेदवाराला वंचित बहुजन आघाडीने लोकसभा निवडणुकीत उतरविले आहे. गेल्या निवडणुकीत किनवट विधानसभा मतदारसंघातून त्यांना पराभवाचा सामना करावा लागला होता.