Maharashtra Election 2019 : संजय शिरसाटांना खरे आव्हान राजू शिंदे यांचेच

१२ उमेदवार रिंगणात 

ठळक मुद्देचौरंगी लढतीची उत्सुकता

- राम शिनगारे

औरंगाबाद पश्चिम विधानसभा मतदारसंघात उमेदवारी अर्ज मागे घेण्याच्या दिवशी लढतीचे चित्र स्पष्ट झाले. काँग्रेस उमेदवाराचा अर्ज बाद झाल्यामुळे पहिल्यांदाच या मतदारसंघात काँग्रेसविना लढत होत आहे. अपक्ष म्हणून निवडणुकीच्या मैदानात उतरलेले राजू शिंदे, एमआयएमचे अरुण बोर्डे आणि विद्यमान आमदार संजय शिरसाट यांच्यामध्ये प्रमुख लढत होणार आहे. यात वंचित बहुजन आघाडीचे उमेदवार संदीप शिरसाट कशा पद्धतीची लढत देतात, यावर बरेच काही अवलंबून असणार आहे. 

औरंगाबाद पश्चिम मतदारसंघाचे दहा वर्षांपासून संजय शिरसाट हे प्रतिनिधित्व करीत आहेत. नुकत्याच झालेल्या लोकसभा निवडणुकीत शिवसेना उमेदवार चंद्रकांत खैरे यांना या मतदारसंघातून मताधिक्य मिळाले होते. मात्र, त्याचवेळी एमआयएमच्या उमेदवारानेही लक्षणीय मते घेतली होती. त्यामुळे लोकसभेतील मताधिक्य राखण्याचे आव्हान संजय शिरसाट यांच्यासमोर असणार आहे. मात्र, याचवेळी भाजपचे नगरसेवक राजू शिंदे यांनी केलेल्या बंडखोरीचा फटका त्यांना बसण्याची शक्यता आहे. याचवेळी लोकसभेत एकत्र असणारी एमआयएम आणि व्हीबीए  आघाडी यावेळी स्वतंत्र लढत आहे. त्यामुळे एमआयएमच्या उमेदवाराचे मताधिक्य हे व्हीबीएच्या उमेदवारावर अवलंबून असणार आहे. यातच काँग्रेस-राष्ट्रवादी आघाडीचा कोणाला पाठिंबा मिळतो यावरही बरेच काही अवलंबून असणार आहे. मतदारसंघातील मूलभूत सुविधांच्या अभावाचा सामना युतीच्या उमेदवाराला करावा लागणार आहे. चौरंगी लढतीमध्ये कोण कोणाची मते स्वत:च्या पारड्यात घेणार यावर सर्व काही अवलंबून असणार आहे. 

मतदारसंघातील प्रमुख प्रश्न
- पश्चिम मतदारसंघ विखुरलेला आहे. पडेगाव, मिटमिटा हा भाग २० वर्षांपासून महापालिकेच्या कार्यक्षेत्रात येतो. मात्र त्याठिकाणी अद्यापही मूलभूत सुविधा मिळालेल्या नाहीत. वर्षभरापूर्वी समाविष्ट झालेल्या सातारा-देवळाईकडेही सत्ताधारी भाजप-शिवसेनेचे दुर्लक्ष आहे.
- वाळूज महानगरची लोकसंख्या बघता दहा वर्षांपूर्वीच नगर परिषदेची निर्मिती करणे गरजेचे होते. विकासाचा केंद्रबिंदू हा अजूनही ग्रामपंचायतच आहे. यात बदल करण्याची गरज असतानाही त्याकडे दुर्लक्ष करण्यात आले आहे.
- औरंगाबाद पश्चिम विधानसभा मतदारसंघातील पडेगाव, मिटमिटा, जुना भावसिंगपुरा, सातारा, देवळाईसह इतर भागांत भीषण पाणीटंचाई जाणवते. सातारा-देवळाई परिसरात अद्यापही पिण्याच्या पाण्याची लाईन टाकलेली नाही. त्यामुळे या भागातील नागरिकांना बारमाही टँकरवरच अवलंबून राहावे लागते.

उमेदवारांच्या जमेच्या बाजू :
संजय शिरसाट (शिवसेना)
- नगरसेवक, सभागृहनेता, स्थायी समिती सभापती, अशा विविध पदांवर मनपात काम केले.
- मुलगा नगरसेवक असून, दहा वर्षांपासून स्वत: आमदार म्हणून कार्यरत. - उद्धव ठाकरे यांचे विश्वासू.
- वाळूज, बजाजनगर, रांजणगावात चांगली पकड.

राजू शिंदे (अपक्ष)
- तीन वेळा नगरसेवक, दोन वेळा स्थायी समिती सभापती, एक वेळा उपमहापौर.
- विधानसभा अध्यक्ष हरिभाऊ बागडे यांचे निकटवर्तीय कार्यकर्ते.
- सर्वच राजकीय पक्षांशी चांगले हितसंबंध असून, राजकीय आव्हाने स्वीकारण्याची जुनी सवय.

अरुण बोर्डे (एमआयएम)
- माजी मंत्री गंगाधर गाडे यांच्या तालमीत जडणघडण. आक्रमक कार्यकर्ता म्हणून ओळख.
- दहा वर्षांपासून सामाजिक कार्यामध्ये अग्रेसर. पत्नी नगरसेविका व विरोधी पक्षनेत्या.
- खा. इम्तियाज जलील यांचे खास विश्वासू.

संदीप शिरसाठ (व्हीबीए)
- विद्यार्थी चळवळीमध्ये सक्रिय सहभाग. विद्यार्थ्यांच्या मदतीला धावून जाण्याची सवय. 
- स्वबळावर आजपर्यंतची  आश्वासक वाटचाल. बेधडकपणे काम करण्याची सवय.
- युवकांचे चांगले संघटन. विविध पक्षांतील युवकांशी मैत्रीचे संबंध.

2०14चे चित्र
सजय शिरसाट ( शिवसेना-विजयी)  
मधुकर सावंत (भाजप-पराभूत)