हुंड्यासाठी विवाहितेचा छळ

औरंगाबाद : घर बांधण्यासाठी माहेरुन दोन लाख रुपये आणण्याची मागणी करून पतीने विवाहितेला नेहमी मारहाण करून उपाशी ठेवले. सततच्या छळाला कंटाळून अखेर विवाहितेने छावणी ठाण्यात तक्रार दाखल केली. पोलिसांनी पती संदीप बोर्डे (रा. निसर्ग कॉलनी), सासू, सासरा व भायाविरुद्ध गुन्हा दाखल केला आहे.

ट्रकला आयशरची पाठीमागून धडक

औरंगाबाद : नागपूर येथून पुण्याकडे चाललेल्या ट्रकला (एमएच ४०- बीएन- ८६८२) पाठीमागून भरधाव येणाऱ्या आयशरची (एचएच २१-बीएच- १३६६) धडक दिली. हा अपघात बीड बायपासवरील गोदावरी हॉटेलसमोर शुक्रवारी रात्री ११ वाजेच्या सुमारास झाला. या अपघातात दोन्ही वाहनांचे नुकसान झाले असून आयशरचालक राजस भाऊसाहेब राजापसरे हा जखमी झाला आहे. ट्रकचालक रामचंद्र ब्राह्मणकर (४७, रा. नागपूर) यांच्या तक्रारीवरून सातारा ठाण्यात गुन्हा दाखल करण्यात आला आहे.

विद्यार्थ्याची मोटारसायकल पळवली

औरंगाबाद : शिक्षणासाठी किरायची खोली घेऊन राहात असलेल्या कृष्णा वैजिनाथ घुले (२५, रा. गहिनीनाथनगर, ता. अंबड) याने समर्थनगर येथील स्वागत बिल्डिंगसमोर उभी करून ठेवलेली मोटारसायकल (एमएच २१- बीसी- ६३१९)

ही अज्ञात चोरट्याने चोरून नेली. ही घटना २२ जानेवारी रोजी रात्री १२.३० वाजता घडली. याप्रकरणी क्रांतीचौक ठाण्यात गुन्हा दाखल करण्यात आला आहे.