निकने प्रियंकाला पाठवले खोलीभर गुलाब

प्रियंका चोप्रासोबत ‘व्हॅलेंटाइन डे’ला निक जोनास नव्हता. मात्र, तरीही प्रियंकाचा व्हॅलेंटाइन डे स्पेशल ठरला. होय, निकने दूर राहूनही तो स्पेशल बनवला. कसा तर त्याने इतकी गुलाबाची फुलं पाठवलीत की, प्रियंकाची खोली लाल गुलाबांनी भरून गेली. प्रियंकाने इन्स्टाग्रामवर एक फोटो शेअर केला आहे. यात ती सोफ्यावर बसलेली दिसतेय आणि तिच्या अवतीभवती खूप सारे गुलाब असून वातावरण अगदी रोमँटिक आहे. प्रियंका सोफ्यावर बसून गुलाबाची फुलं न्याहाळतेय. ‘जर, तू इथे असता आणि सोबत काही फुलं...,’ असे तिने लिहिले. यावर निकनेही लगेच कमेंट केली. ‘फक्त आणखी काही दिवस...,’

‘छत्रपती ताराराणी’ साकारणार सोनाली कुलकर्णी

सरसेनापती हंबीरराव मोहिते यांची कन्या आणि छत्रपती राजाराम भोसले यांच्या पत्नी असणाऱ्या ताराबाई यांनी छत्रपती शिवाजी महाराज आणि छत्रपती संभाजी महाराज यांच्यामागे कणखरपणे स्वराज्याची धुरा सांभाळली. अशा या रणरागिणीची शौर्यगाथा सर्वांपर्यंत पोहोचावी, या उद्देशाने राहुल जनार्दन जाधव दिग्दर्शित ‘छत्रपती ताराराणी’ या चित्रपटाची नुकतीच घोषणा करण्यात आली आहे. डॉ. जयसिंगराव पवार लिखित ‘मोगलमर्दिनी महाराणी ताराराणी’ या चरित्रग्रंथावर आधारित या चित्रपटात ताराराणीची भूमिका सोनाली साकारणार आहे.

पूजा सावंत म्हणाली, लव्ह यू मित्रा

गेल्या काही दिवसांपासून पूजा सावंत आणि गश्मिर महाजनी या दोघांमधील अफेअरची चर्चा सुरू झाली होती. पूजा सावंतने थेट गश्मिरला लव्ह यू म्हटल्यानंतर अनेक तर्कवितर्क लावले जात होते. सोशल मीडियावर दोघांचे चॅटिंगही व्हायरल झाले होते. यामागचे कारण आता समोर आले आहेत. ‘लव्ह यू मित्रा’ नावाचा सिनमा येत असून यात पूजा सावंत, गश्मिर महाजनी हे प्रमुख भूमिकेत आहेत. या चित्रपटातील आणखी एका कलाकाराचे नाव मात्र अद्यापही गुलदस्त्यात आहे. त्यामुळे आता हा तिसरा कलाकार कोण असणार, हे जाणून घेणे औत्सुक्याचे ठरणार आहे.