जुन्या भांडणावरून तुंबळ हाणामारी

अंबी : मागील भांडणाच्या कारणावरून सोनारी (ता़परंडा) येथे दोघांमध्ये तुंबळ हाणामारी झाली़ ही घटना बुधवारी सायंकाळी घडली असून, या प्रकरणी परस्पर विरोधी फिर्यादीवरून दोघांविरूध्दही अंबी पोलीस ठाण्यात गुन्हा नोंदविण्यात आला आहे़
याबाबत सदाम रफिक शेख यांनी दिलेल्या फिर्यादीत म्हटले की, परंडा तालुक्यातील सोनारी रस्त्यालगत असलेल्या हॉटेलमध्ये बुधवारी सायंकाळी आलेल्या अनिल सदाशिव माने याने मागील भांडणाची कुरापत काढून शिवीगाळ करून मारहाण केली़ तसेच दुकानातील साहित्य फेकून दिले़ शेख यांच्या फिर्यादीवरून अनिल माने याच्याविरूध्द गुन्हा दाखल करण्यात आला आहे़ तर अनिल माने याने दिलेल्या फिर्यादीवरून सद्दाम रफिक शेख, हुसेन रफिक शेख या दोघांविरूध्द गुन्हा दाखल करण्यात आला आहे़ दरम्यान, सदरील घटनेचा अधिक तपास पोहेकॉ मुळे हे करीत आहेत़ (वार्ताहर)
एकास मारहाण
उमरगा : शेतातील सोयाबीन पाहण्यासाठी गेलेल्या एकाला मारहाण करणाऱ्यांविरूध्द उमरगा ठाण्यात गुन्हा दाखल करण्यात आला आहे़ ही घटना मंगळवारी दुपारी तालुक्यातील काळनिंबाळा शिवारात घडली़ जकेकूर येथील जब्बार मेहताब मुल्ला हे मंगळवारी दुपारी काळनिंबाळा शिवारातील शेतात सोयाबीन उगवले का हे पाहण्यासाठी गेले होते़ त्यावेळी तेथे आलेल्या इसमांनी ‘शेत तुझ्या बापाचे आहे का ?’ असा जाब विचारत शिवीगाळ करून मारहाण केली़ तसेच काठीने डोक्यात मारहाण करून जखमी केल्याची फिर्याद जब्बार मुल्ला यांनी उमरगा ठाण्यात दिली़ या फिर्यादीवरून संबंधितांविरूध्द गुन्हा दाखल करण्यात आला आहे़