अदालत रोडवर भरधाव शहर बसने पादचाऱ्याला चिरडले

अदालत रस्त्यावरील जिल्हा बॅंकेसमोर मागून सुसाट आलेल्या शहर बसने त्यांना चिरडले .

औरंगाबाद: भरधाव शहर बसने पादचाऱ्याला चिरडल्याची घटना अदालत रोडवरील जिल्हा बॅंकेसमोर बुधवारी सकाळी ९:४५ वाजेच्या सुमारास घडली . याविषयी वेदांतनगर ठाण्यात तक्रार दाखल करण्यात आली . 

लक्ष्मण बाबूराव पाचे (४२, रा . चिकलठाणा ) असे मयताचे नाव आहे . पोलिसांनी सांगितले की , पाचे हे अदालत रोड परिसरातील एका बांधकाम व्यवसायिकाकडे नोकरी करीत होते . नेहमीप्रमाणे आज सकाळी ते जेवणाचा डबा हातात घेऊन घरून निघाले. कार्यालयापासून जवळच असलेल्या अदालत रस्त्यावरील जिल्हा बॅंकेसमोर मागून सुसाट आलेल्या शहर बसने त्यांना चिरडले . विशेष म्हणजे पाचे हे रस्त्याच्या डाव्या बाजूने पायी चालत असतांना त्यांना उडविल्यानंतर सुमारे १५ ते २० फुट फरफटत नेले . 

या घटनेत मागील चाकाखाली आल्याने गंभीर जखमी झालेल्या पाचे यांना प्रत्यक्षदर्शी आणि बसचालकाने उचलून फूटपाथवर ठेवले यानंतर त्यांना रुग्णालयात नेण्यासाठी पोलीसचे वाहन अथवा रुग्णवाहिकेला फोन केला . मात्र, दोन्ही वाहने येण्यास विलंब होत असल्याचे पाहून नागरिकांच्या सांगण्यावरून चालकाने पाचे यांना बसमधून घाटी रुग्णालयात दाखल केले . तेथे उपचार सुरू असतांना त्यांचा मृत्यू झाला. या विषयी वेदांतनगर ठाण्यात घटनेची नोंद करण्यात आली . पोलीस निरीक्षक रामेश्वर रोडगे यांच्या मार्गदर्शनाखाली उपनिरीक्षक शंकर डुकरे तपास करित आहेत.