ओटीटी सेन्सॉरशिपच्या हेतूवर पूजा भटला संशय

अभिनेत्री पूजा भटने नुकतेच एका मुलाखतीत ओटीटी सेन्सॉरशिपच्या मुद्द्यावर मत मांडले आहे. तिच्या मते, एक दिग्दर्शक आपल्या चित्रपट वा सीरिजद्वारे एक संदेश लोकांना देऊ इच्छितो. त्यावरही कायदे-नियम थोपले जातात. आपल्या प्रत्येकाच्या मनात एक सेन्सॉर बोर्ड असते. काय दाखवले पाहिजे, हे ते बोर्ड सांगत असते. माझ्यापुरते सांगायचे झाल्यास, मला योग्य वाटते, ते मी दाखवेलच आणि यासाठी अखेरच्या श्वासापर्यंत लढावे लागले तरी लढेन. फिल्ममेकर्सला त्यांची कथा त्यांच्या पद्धतीने मांडण्यापासून रोखणे, हाच सरकारचा हेतू आहे,’ दरम्यान, ती लवकरच ‘बॉम्बे बेगम्स’ या सीरिजद्वारे ओटीटी प्लॅटफॉर्मवर डेब्यू करतेय.

आमच्या हेटर्सला खूप साऱ्या शुभेच्छा

आयकर विभागाच्या धाडसत्रानंतर अभिनेत्री तापसी पन्नू आणि दिग्दर्शक अनुराग कश्यप यांनी पुन्हा एकदा कामाला सुरुवात केली आहे. धाडसत्रानंतर तापसीने ट्विट करत, टीकाकारांना सणसणीत उत्तर दिले होते. आता अनुराग कश्यप यानेही हेटर्सला आपल्या खास शैलीत सुनावले आहे. अनुरागने तापसी पन्नूसोबतचा एक फोटो पोस्ट केला आहे.‘... आणि आम्ही #DoBaaraa सुरुवात करतोय. आमच्या हेटर्सला आमच्याकडून खूप साऱ्या शुभेच्छा, ’ असे उपरोधिक कॅप्शन त्याने या फोटोवर दिले आहे. तापसी व अनुरागचा हा फोटो ‘दोबारा’ या चित्रपटाच्या सेटवरचा आहे.

लग्नासाठी स्वरा भास्कर तयार

नुकताच अभिनेत्री स्वरा भास्करने सोशल मीडियात तिचा फोटो शेअर केला आहे. हा फोटो शेअर करत तिने ‘लग्नासाठी मुलगा हवा आहे’ अशा आशयाची एक पोस्ट लिहिली आहे. ‘अरेंज मॅरेजसाठी हा फोटो. या फोटोत दिसणाऱ्या मुलीला स्वयंपाक येत नाही, चहा कधी कधी चांगला करता येतो…तिच्यासोबत एक कुत्रा आहे. ती त्या कुत्र्याला तिचा मुलगा समजते. कधी कधी तिच्या डोक्यात बंडखोरीचे विषय येतात, आंदोलनजीवी आणि देशद्रोही असल्याचा तिच्यावर आरोप आहे… चांगल्या घरची सून होण्यासाठी उत्तम मुलगी’ या आशयाचे ट्वीट स्वराने केले आहे.