बनावट मतदार कार्ड बनविणाऱ्या डिजिटल केंद्रावर छापा; दोन अटकेत

fake voter cards in aurangabad पोलीस निरीक्षक घनश्याम सोनवणे यांनी महसूलच्या अधिकाऱ्यांना सोबत घेऊन या दुकानावर बनावट ग्राहक पाठवले

ठळक मुद्देपुंडलिकनगर पोलिसांची कारवाई

औरंगाबाद: बनावट मतदार कार्ड बनवून निवडणूक आयोगाची फसवणूक करणाऱ्या गजानन कॉलनीतील डिजीटल केंद्र आणि महा ई सेवा केंद्रावर पुंडलिकनगर पोलीस आणि महसूलच्या अधिकाऱ्यांनी बुधवारी रात्री छापा टाकून दोघांना अटक केली. आरोपीकडुन संगणक, प्रिंटर आणि मोबाईल असे साहित्य जप्त केले .

हरीश धुराजी वाघमारे (२२) आणि नवनाथ भक्तदास शिंदे (२६) अशी आरोपींची नावे आहेत . पुंडलिकनगर पोलिसांनी दिलेल्या प्राप्त माहितीनुसार गजानन कॉलनीतील मातोश्री डिजीटल या दुकानात बनावट मतदार कार्ड तयार केले जाते, अशी माहिती खबऱ्याने पोलिसाना दिली. यानंतर सहाय्यक पोलीस निरीक्षक घनश्याम सोनवणे यांनी महसूलच्या अधिकाऱ्यांना सोबत घेऊन या दुकानावर बनावट ग्राहक पाठवून नवीन मतदार कार्ड तयार करुन देता का अशी विचारणा करण्यास सांगितले. त्यानुसार पोलिसांचा पंटर ग्राहक बनून तेथे गेला. त्याने केलेल्या मागणीनुसार हरीश वाघमारे याने निवडणूक आयोगाच्या वेबसाईटवरुन माहिती मिळविली. 

या माहितीमध्ये मतदाराचे केवळ नाव आणि पत्ता, वय असते छायाचित्र नसते. यामुळे त्याने ग्राहकाचा नवीन पासपोर्ट साईज छायाचित्र घेऊन ओळखपत्र तयार केले. यावर निवडणूक विभागाच्या मतदार नोंदणी अधिकाऱ्याची बनावट इलेक्ट्रॉनिक ॲटोमॅटीक सही चिकटवली. यानंतर या मतदार कार्ड चे स्मार्ट कार्ड तयार करून देण्यासाठी त्याने त्याचा मित्र नवनाथ शिंदे याच्या महा ई सेवा केंद्राच्या ई मेल वर पाठविले. शिंदे हा मतदार कार्ड चे स्मार्ट कार्ड तयार करून देण्याचे काम करतो. 

यानंतर पोलिसांनी तेथील साहित्य जप्त केले आणि आरोपीसह महा ई सेवा केंद्रावर धाड टाकली . तेथे संगणक,प्रिंटर असा सुमारे ३९ हजार २०० रुपयांचा असा ऐवज जप्त केला. तहसीलदार शंकर लाड ,नायब तहसीलदार रेवणनाथ ताठे ,सपोनि सोनवणे, फौजदार विकास खटके, प्रभाकर सोनवणे, हवालदार रमेश सांगळे, बाळाराम चौरे, शिवाजी गायकवाड, राजेश यदमळ आणि माया उगले यांनी ही कारवाई केली .