सामुहिक अत्याचार नाही; मदतीच्या बहाण्याने रिक्षाचालकाने केले अल्पवयीन मुलीचे शोषण

८ जानेवारी रोजी रात्री चिकलठाणा रेल्वेस्थानक येथे बेवारस अवस्थेत आढळलेल्या १६ वर्षीय मुलीने दिलेल्या माहितीनुसार, उस्मानपुरा पोलिसांनी अज्ञात तीन आरोपीवर सामूहिक अत्याचार केल्याचा गुन्हा नोंदविला.

ठळक मुद्देमदतीच्या बहाण्याने अनोळखी रिक्षाचालकाने तिला त्यांच्या घरी नेले. स्वतःच्या घरात तिच्यावर बळजबरीने अनेकदा अत्याचार केले

औरंगाबाद: चिकलठाणा रेल्वेस्थानक येथे बेवारस अवस्थेत आढळलेल्या १६ वर्षीय परप्रांतीय पिडीत मुलीने दिलेल्या माहितीमधून नवा खुलासा झाला आहे. रेल्वेस्थानकावर तीन नराधमानी नव्हे तर तिच्यासोबत बळजबरीने लग्न लावून स्वतःच्या घरी ठेवणाऱ्या नराधम रिक्षाचालकाने तीचे लैंगिक शोषण केल्याचे पोलीस तपासांत समोर आले असून पोलीस त्या रिक्षाचालकाचा शोध घेत आहेत.

याविषयी वरिष्ठ सुत्राने सांगितले की, ८ जानेवारी रोजी रात्री चिकलठाणा रेल्वेस्थानक येथे बेवारस अवस्थेत आढळलेल्या १६ वर्षीय मुलीने दिलेल्या माहितीनुसार, उस्मानपुरा पोलिसांनी अज्ञात तीन आरोपीवर सामूहिक अत्याचार केल्याचा गुन्हा नोंदविला. पिडितेच्या तक्रारीनुसार पोलिसांनी घटनास्थळ आणि परिसरातील सीसीटीव्ही कॅमेऱ्याच्या छायाचित्रण तपासले असता सीसीटीव्ही कॅमेऱ्यात आक्षेपार्ह काहीही आढळून आले नाही. 

आभागी तरुणीवर अत्याचार करणारे कोण याचे कोडे उलगडले नाहीhttps://t.co/FnewhqTc4m

— Lokmat Aurangabad (@milokmatabd) January 12, 2021

यानंतर पोलिसांनी डॉक्टरांसमोर तिच्याकडे या घटनेविषयी पुन्हा विचारपूस केली असता, तिने तिघांनी अत्याचार केल्याचे आपण घाबरून सांगितल्याचे नमूद केले. मदतीच्या बहाण्याने अनोळखी रिक्षाचालकाने तिला त्यांच्या घरी नेले. यानंतर त्याने तिच्या मनाविरुद्ध मंदीरात नेऊन लग्न केले. यानंतर त्याने स्वतःच्या घरात तिच्यावर बळजबरीने अनेकदा अत्याचार केल्याची माहिती तिने पोलिसांना दिली. तिचा नव्याने जबाब पोलिसांनी नोंदवून घेतला. या घटनेनंतर पोलिसांनी अत्याचारी रिक्षाचालकाचा शोध सुरू केला. आरोपीचे घर कोणत्या कॉलनीत आहे हे मात्र पिडितेला सांगता आले नाही. मात्र त्याच्या घराचे वर्णन आणि त्याचे आई वडिल त्याच्या घरी असतात असे सांगितले.