रोटेगाव रेल्वे स्टेशनला सर्व गाड्या थांबवा

वैजापूर : रोटेगाव रेल्वे स्टेशनवर सर्व रेल्वे थांबवाव्यात, अशी मागणी माजी नगराध्यक्ष व जिल्हा बँकेचे संचालक डॉ. दिनेश परदेशी यांनी केंद्रीय रेल्वे राज्यमंत्री रावसाहेब दानवे यांच्याकडे निवेदनाद्वारे केली आहे.

रोटेगाव रेल्वे स्टेशन हे वैजापूर शहराला लागून आहे. येथून जाणारे व येणारे प्रवासी मोठ्या प्रमाणावर असतात. वैजापूर शहराची लोकसंख्या मोठी असल्याने प्रवासी संख्याही जास्त आहे. परंतु, रोटेगाव रेल्वेस्थानकावर सर्व रेल्वे थांबत नसल्यामुळे प्रवाशांची गैरसोय होते. त्यामुळे सर्व प्रवासी रेल्वे रोटेगाव स्थानकावर थांबावाव्यात, अशी मागणी डॉ. दिनेश परदेशी यांनी केंद्रीय रेल्वे राज्यमंत्री रावसाहेब दानवे यांच्याकडे ते वैजापूर येथे आल्यानंतर निवेदनाद्वारे केली आहे. रोटेगाव रेल्वे स्थानकावर हैद्राबाद ते अजमेर, अजमेर-हैद्राबाद एक्स्प्रेस या गाड्यांना थांबा द्यावा. त्यामुळे अजमेरला जाणाऱ्या प्रवाशांची सोय होईल. नगरसोल-रेनीगुंठा ही गाडी या स्थानकांवर थांबवावी. त्यामुळे शिर्डी व तिरुपती जाणाऱ्या भाविकांची सोय होईल. जालना-मुंबई जनशताब्दी एक्स्प्रेस, नगरसोल-नरसापूर या गाडीला थांबा द्यावा, तसेच काचीगुडा-नगरसोल, जालना-शिर्डी या गाड्या सध्या चालू नाहीत, त्या चालू करून त्यांनाही थांबा द्यावा, अशी मागणी परदेशी यांनी केली आहे.