मजुरांच्या ट्रॅक्टरला भरधाव कंटेनरची धडक; एक मजूर ठार, १५ जण जखमी

सर्व जखमी गुजरातचे आहेत ३ महिन्यांपूर्वी कामासाठी बीड जिल्ह्यात आले असल्याची माहिती आहे.

ठळक मुद्देहा अपघात मंगळवारी सकाळी १०  वाजता खामंगाव जवळ घडला सर्व मजूर आयआरबी या कंपनीचे आहेत. 

गेवराई : शहागडहून मजूर घेऊन गेवराईकडे येणाऱ्या एका ट्रॅक्टरला भरधाव कॅन्टेनरने जोराची धडक दिल्याने झालेल्या अपघातात एक मजूर ठार झाला असून १५ जण जखमी झाले आहेत. हा अपघात मंगळवारी सकाळी १०  वाजता खामंगाव जवळ घडला असून सर्व मजूर आयआरबी या कंपनीचे आहेत. 

याबाबत अधिक माहिती अशी की, आयआरबी या कंपनीचे काही मजूर शहागडहून गेवराईकडे एका टॅक्टरमधून येत होते. दरम्यान, खामगावजवळ पाठीमागून भरधाव येणाऱ्या कॅन्टेनरने आधी एका दुचाकीला जोराची धडक दिली. त्यानंतर हे कॅन्टनर मजूर असलेल्या ट्रॅक्टरला पाठीमागून धडकले. यामुळे टॅक्टर उलटला आणि त्यातील सर्व मजूर रस्त्यावर कोसळले. 

अपघात एवढा भीषण होती की यात दोन्ही वाहनांचा चक्काचुर झाला आहे. यावेळी मजूर रेखा रावत या जागीच ठार झाल्या तर इतर १५ मजूर जखमी झाले. जखमींवर गेवराई येथील उपजिल्हा रूग्णालयात प्राथमिक उपचार करण्यात आले. त्यानंतर अधिक उपचारासाठी जखमींना बीड जिल्हा रूग्णालयात पाठवण्यात आले. सर्व जखमी गुजरातचे आहेत ३ महिन्यांपूर्वी कामासाठी बीड जिल्ह्यात आले असल्याची माहिती आहे.