पट्ट्यातील बातम्या : फुलंब्री- खुलताबाद रस्त्याचे काम संथगतीने

खुलताबाद रस्त्याचे सध्या सिमेंट काम होत आहे. मात्र, ठेकेदाराकडील यंत्रणा अपुरी पडत असल्याने हे काम संथगतीने होत आहे. एका बाजूला रस्ता उखडून टाकल्यानंतर अनेक दिवस काम होत नसल्याने वाहनधारक त्रस्त झाले आहेत. त्यामुळे ठेेकेदाराला सक्त ताकीद देऊन रस्ता काम लवकर करण्याच्या सूचना देण्याची मागणी नागरिक करीत आहेत.

-------------------------------------------------------------------

लघुशंका करणाऱ्यांवर कारवाईची मागणी

फुलंब्री : जिल्हा परिषद शाळेच्या प्रवेशद्वार व आतमध्ये दररोज रात्रीच्या प्रसंगी अनेक जण लघुशंका तसेच शौच करीत आहेत. यामुळे परिसरात दुर्गंधी पसरत असून शाळेत आल्यानंतर नाक दाबून यावे लागते. यामुळे या लघुशंका व शौच करणाऱ्या व्यक्तींवर कारवाई करण्याची मागणी नागरिकांनी केली आहे.

----------------------------------------------------------------------------

प्रशासकीय इमारत परिसरात वाहनांची गर्दी

फुलंब्री : येथील मुख्य शासकीय इमारतीच्या प्रवेशद्वारावरच नागरिक वाहने उभी करीत असल्याने ये-जा करणाऱ्या वाहनांना अडथळे येत आहेत. तालुकाभरातून नागरिक येथे कामासाठी येतात. बेशिस्तपणे वाहने उभी करणारांवर कारवाई करण्याची मागणी नागरिकांमधून होत आहे.