भररस्त्यात तरुणाने कोयता उगारला; किरकोळ कारणावरून भिडलेल्या सहा तरुणांना पोलिसांनी घेतले ताब्यात

औरंगपुरा जिल्हा परिषदेसमोर त्यांच्यात पुन्हा भांडण सुरू झाले. याचवेळी गस्तीवरील पोलिसांनी त्यांना पकडले.

ठळक मुद्देएकाने कोयता उगारला मात्र लोक जमा होत असल्याचे पाहून भांडण थांबवून ते पुढे निघाले.

औरंगाबाद : किरकोळ कारणावरून शिवाजीनगर येथे आपसांत हाणामारी केल्यामुळे पोलिसांच्या सांगण्यानुसार घाटी रुग्णालयात जात असताना नूतन कॉलनी रस्त्यावर आणि पुढे जिल्हा परिषद कार्यालयासमोर त्यांच्यात पुन्हा हाणामारी झाली. यावेळी एका जणाजवळ कोयता होता. ही घटना कळताच पोलिसांनी त्यांना पकडले.

प्राप्त माहितीनुसार, शिवाजीनगर येथील सहा तरुणांत बुधवारी सायंकाळी हाणामारी झाली. यानंतर ते पुंडलिकनगर ठाण्यात तक्रार देण्यासाठी गेले असता पोलिसांनी त्याना मेडिकल मेमो दिले आणि घाटीत उपचारांसाठी पाठविले. दोन दुचाकीवरुन सहा जण घाटीत जात असताना नूतन कॉलनी येथे त्यांच्यात पुन्हा हाणामारी झाली. यावेळी एकाने कोयता उगारला मात्र लोक जमा होत असल्याचे पाहून भांडण थांबवून ते पुढे निघाले. तेथून औरंगपुरा जिल्हा परिषदेसमोर त्यांच्यात पुन्हा भांडण सुरू झाले. याचवेळी गस्तीवरील पोलिसांनी त्यांना पकडले. यावेळी एकाच्या हातातील कोयता पोलिसांनी जप्त केला. यावेळी त्यांनी त्यांच्यातील भांडण मिटल्याचे पोलिसांना सांगितले. यामुळे सरकारतर्फे त्यांच्याविरुध्द सिटीचौक ठाण्यात गुन्हा नोंदविण्याची कारवाई रात्री उशिरापर्यंत सुरू होती.