‘तेरे बिन नही जीना, मर जाना...’, आत्महत्येनंतर अभियंत्याच्या खोलीत सापडली अनेक प्रेमपत्रे

खोलीत काही प्रेमपत्रे आढळून आल्याने प्रेमप्रकरणातूनच ही आत्महत्या केल्याचा अंदाज पोलिसांनी वर्तविला आहे.

जायकवाडी : ‘तेरे बिन नही जीना, मर जाना ढोलना’ असे प्रेमपत्रात लिहून तरुण अभियंत्याने पिंपळवाडी (ता. पैठण) येथील राहत्या घरात गळफास घेऊन आत्महत्या केल्याची घटना सोमवारी (दि.४) सकाळी समोर आली. निखिल दत्तात्रय चौडांळे (२५, मूळगाव - पंढरपूर, ह. मु. आदर्शनगर, पिंपळवाडी, ता. पैठण) असे आत्महत्या केलेल्या युवकाचे नाव आहे. याप्रकरणामुळे परिसरात खळबळ उडाली आहे.

निखिल चौडांळे हा तरुण अभियंता एमआयडीसी पैठण येथील एका कंपनीत नोकरी करीत होता. तर राहण्यासाठी आदर्शनगर-पिंपळवाडी येथे भाड्याने खोली करून राहत असे. सोमवारी सकाळी तो घराच्या बाहेर न पडल्याने शेजाऱ्यांनी चौकशी केली असता फासावर लटकलेल्या अवस्थेत आढळून आला. पोलिसांना माहिती मिळताच त्यांनी घटनास्थळी धाव घेतली. तेव्हा निखिलच्या खोलीत काही प्रेमपत्रे आढळून आल्याने प्रेमप्रकरणातूनच ही आत्महत्या केल्याचा अंदाज पोलिसांनी वर्तविला आहे. दरम्यान, एका पत्रात तेरे बिन नही जीना, मर जाना ढोलना असे हिंदी चित्रपटातील गाण्याचे बोल लिहिलेले असल्याचे पोलीस सूत्रांकडून सांगण्यात आले. खोलीतील सर्व प्रेमपत्रे पोलिसांनी ताब्यात घेतली आहेत. 

पैठणच्या शासकीय रुग्णालयात शवविच्छेदन करून निखिलचा मृतदेह नातेवाइकांच्या ताब्यात देण्यात आला. याप्रकरणी एमआयडीसी पैठण पोलीस ठाण्यात अकस्मात मृत्यूची नोंद झाली. पुढील तपास सपोनि. भागवत नागरगोजे यांच्या मार्गदर्शनाखाली उपनिरीक्षक दिलीप चौरे, जमादार खंडू मंचरे हे करीत आहेत.