'व्हॅलेंटाईन डे'ला भयंकर घडले; मुलीचे नाव घेत तरुणाने पेटवून घेत जीवन संपवले

Suicide on Valentine’s Day व्हॅलेंटाईन डेला तरुणाने आत्महत्या केल्यामुळे त्याचा प्रेमभंग झाला असावा, या दृष्टीने पोलिसांनी तपास सुरू केला आहे

ठळक मुद्देशिवशंकर कॉलनीत रविवारी मध्यरात्रीची घटनातरुण १०० टक्के जळाल्याने त्याची ओळख पटेना

औरंगाबाद : संपूर्ण जग व्हॅलेंटाईन डे साजरा करीत असताना रविवारी (दि.१४) मध्यरात्री २० ते २५ वर्षांच्या अनोळखी तरुणाने अंगावर पेट्रोल ओतून जाळून घेऊन आत्महत्या केल्याची खळबळजनक घटना शिवशंकर कॉलनीत घडली. या घटनेत १०० टक्के जळाल्याने तो घटनास्थळीच मरण पावला. यावेळी तो एका तरुणीच्या नावाने ओरडत होता, प्रेमभंग झाल्यामुळे त्याने आत्महत्या केली असावी, अशी शक्यता पोलिसांनी वर्तविली.

शिवशंकर कॉलनीतील शिव हनुमान मंदिरामागील गल्लीत एका अनोळखी तरुणाने अंगावर पेट्रोल ओतून जाळून घेतले. पेटलेल्या अवस्थेत तो एका तरुणीच्या नावाने ओरडत ओरडत शांत होऊन कोसळला. ही माहिती मिळताच, जवाहरनगर पोलिसांनी घटनास्थळी धाव घेतली. तोपर्यंत उशीर झाला होता. पोलिसांनी मृतदेह घाटी रुग्णालयात हलविला. पोलिसांनी सांगितले की, घटनेपासून सोमवारी रात्री उशिरापर्यंत मृताची ओळख पटलेली नाही. तरुणाचे वय अंदाजे २० ते २५ वर्षे असावे. त्याच्या अंगावर मरून रंगाचा टी शर्ट आणि काळी जिन्स आहे. डाव्या हातावर इंग्रजीत आकाश अक्षर आहे, तर उजव्या हातावर अश्विनी नावाचा टॅटू काढलेला. उजव्या हातातील एका बोटात खड्याची अंगठी आहे. त्याचा मोबाइलचाही या घटनेत जळाला. यामुळे त्याची ओळख पटलेली नाही. या वर्णनाच्या तरुणाला कोणी ओळखत असेल, तर तातडीने जवाहरनगर पोलीस ठाण्याशी संपर्क साधावा, असे आवाहन पोलीस निरीक्षक संतोष पाटील यांनी केले. याविषयी जवाहरनगर ठाण्यात आकस्मिक मृत्यूची नोंद करण्यात आली. पोलीस उपनिरीक्षक शशिकांत तायडे तपास करीत आहेत.

प्रेमभंगातून आत्महत्या केल्याचा कयास
व्हॅलेंटाईन डेला तरुणाने आत्महत्या केल्यामुळे त्याचा प्रेमभंग झाला असावा, या दृष्टीने पोलिसांनी तपास सुरू केला असल्याचे फौजदार तायडे यांनी सांगितले. त्याने जाळून घेतले, तेव्हा तो मुलीचे नाव घेऊन ओरडत होता, यावरून या घटनेला प्रेम प्रकरणाची किनार असण्याची शक्यता नाकारता येत नसल्याचे ते म्हणाले. हा तरुण कोण होता, याविषयी घटनास्थळावरील गल्लीतील लोकांना माहिती नसल्याचे ते पोलिसांना सांगत आहेत.