सिल्लोड शहरात सहा घरात चोरट्यांचा धूमाकू‌ळ

सिल्लोड : सिल्लोड शहरातील आनंद पार्क व सहारे ट्रेड सेंटरमध्ये सहा ठिकाणी चोरी झाल्याची घटना समोर आली. यात हजारो रुपयांचा ऐवज अज्ञात चोरट्यांनी लंपास केल्याचा प्राथमिक अंदाज आहे. मागील दोन दिवसात या चोरीच्या घटना घडल्या.

कोरोनामुळे शहरातील आनंद व सहारे ट्रेड सेंटरमधील नागरिक घरांना कुलूप लावून गावी गेलेले आहेत. या दोन्ही ठिकाणी सहा घरांमध्ये चोरी झाली. या ठिकाणी सीसीटीव्ही कॅमेरे बसविलेले आहेत. मात्र हार्ड डिस्क कनेक्शन व्यवस्थित नसल्याने त्याचा उपयोग झाला नाही. काही ठिकाणचे मालक हजर नसल्याने चोरीला नेमके काय गेले असावे, याबाबत कळू शकले नाही. पोलिसांनी घटनास्थळी दाखल होत पंचनामा केला. श्वान पथकाला पाचारण करून सुगावा लावण्याचा प्रयत्न केला. मात्र त्यात त्यांना यश आले नाही.

--

या नागरिकांच्या घरात झाली चोरी

कुंडलिक तुपे, चंद्रमणी भगत, नीलेश भिका राजपूत व गौरव नरहरी पोमने (रा. आनंद पार्क) व रमेश किसन परदेशी, सदाशिव फुसे (रा. सहारे ट्रेड सेंटर) यांच्या घरात चोरी झाली आहे. कुंडलिक तुपे यांच्या फिर्यादीवरून अज्ञात चोरट्याविरुद्ध गुन्हा दाखल करण्यात आला. पुढील तपास पोलीस निरीक्षक राजेंद्र बोकडे यांच्या मार्गदर्शनाखाली पोउनि सुनील अंधारे हे करीत आहेत.