यंदाही घरातूनच तथागताना वंदन

आज बुद्ध जयंती : भिक्खू संघाचे ऑनलाइन कार्यक्रम

औरंगाबाद : कोरोना संकट अजून टळलेले नाही. दया, करुणा, मैत्री बुद्धांच्या या शिकवणीप्रमाणे या महामारीत दुसऱ्याची काळजी घेण्यासाठी उपासकांनी बुधवारी २६ मे रोजी सार्वत्रिक कार्यक्रमाचे आयोजन न करता घरातूनच तथागत भगवान गौतम बुद्धांची जयंती साजरी करावी, असे आवाहन भदन्त बोधीपालो महास्थवीर, भदन्त विशुद्धानंदबोधी महास्थवीर, भारतीय बौद्ध महासभेचे जिल्हाध्यक्ष किशोर जोहरे यांनी केले आहे.

कोरोनाची दुसरी लाट थोपविण्यासाठी उपासक- उपासिकांनी शासनाच्या नियमांचे पालन करुन घरातूनच तथागत भगवान गौतम बुद्ध यांची २५६५ वी जयंती महोत्सव साजरा करावी. घराघरांवर पंचशील ध्वज फडकावून त्रिशरण, पंचशील, आर्यआष्टांगिक मार्गाचे पठण करावे. घरातील सर्वांनी शुभ्रवस्त्र परिधान करून तथागतांच्या प्रतिमेची पुष्प, दीप, धुपाने पूजा करावी. विहारांमध्ये भिक्खुंनी गर्दी न जमवता पूजा, महापरित्राण पाठ व बुद्धांच्या प्रतिमेला वंदन करावे. उद्या, बुधवारी सकाळी ९ वाजता आयोजित केलेल्या भिक्खू संघाच्या ऑनलाई धम्मदेशनेच्या कार्यक्रमात सहभागी व्हावे, असा संदेश भदन्त बोधिपालो महास्थवीर यांनी समाजबांधवांंना दिला आहे.

दुसरीकडे, भदन्त नागसेन, बौद्ध महासभेचे जिल्हाध्यक्ष किशोर जोहरे यांनी कळविले की, बुद्धलेणीच्या पायथ्याला विपश्यना सभागृहात सामूहिक बुद्धवंदनेचा कार्यक्रम होणार नाही. मोजक्याच भिक्खुंच्या उपस्थितीत पहाटे ५ वाजेपासून ध्यानसाधना, महापरित्राणपाठ तसेच सकाळी ८ वाजता धम्मध्वजारोहणाचा कार्यक्रम होईल. यावेळी सहायक पोलीस आयुक्त भापकर, सराफ, बेगमपुरा ठाण्याचे प्रभारी सानप यांची उपस्थिती राहील. समता सैनिक दलाच्यावतीने नियमांचे पालन करून मानवंदना दिली जाईल. भंते ज्ञानरक्षीत यांनी कळविले की, धम्ममय भारत मिशन अंतर्गत उद्या पहाटे ५ ते रात्री ९ वाजेपर्यंत ऑनलाइन कार्यक्रमाचे आयोजन केले आहे. या कार्यक्रमात भाग घेणाऱ्या प्रत्येकाला धम्ममय भारत मिशन अंतर्गत प्रमाणपत्र देण्यात येणार आहे.

चौकट.....

सार्वजनिक मिरवणुकीला फाटा

दरवर्षी भिक्खू संघाच्यावतीने क्रांती चौक येथून सजविलेल्या रथावर तथागत बुद्धांच्या प्रतिमेची मिरवणूक काढून ती भडकलगेटजवळ डॉ. बाबासाहेब आंबेडकरांच्या पुतळ्याजवळ विसर्जित केली जाते. त्यानंतर पोलीस आयुक्तालयात तथागतांची पूजा करून भिक्खू संघाला भोजनदान देण्याची प्रथा आहे; परंतु कोरोना संसर्गामुळे मागील वर्षी आणि यंदाही ही प्रथा स्थगित करण्यात आली आहे.