रॉंग साईडने आलेल्या उसाने भरलेल्या ट्रॅक्टरला ट्रकची धडक

दौलताबाद : सोलापूर-धुळे महामार्गावरील फतियाबाद गावाजवळ ट्रक व ट्रॅक्टरचा भीषण अपघात झाला. या अपघातात ट्रकने ऊस भरलेल्या ट्रॅक्टरला इतक्या जोराची धडक दिली की, यात ट्रॅक्टरचे दोन तुकडे झाले आहेत. यात अपघातात ट्रकचालक व त्याचा साथीदार गंभीर जखमी झाला असून, ट्रॅक्टरचालक व त्याचे साथीदार घटनास्थळावरून पळून गेले. हा अपघात मंगळवारी पहाटे चारच्या सुमारास घडला आहे.

पोलिसांकडून मिळालेल्या माहितीनुसार, ट्रकचालक संतोष रणखांबे (वय ३०) व एकनाथ साबळे (२८, दोघेही रा. आडगाव, ता. जिंतूर, जि. परभणी) हे धुळे येथून ट्रक (एमएच २० सीटी ८६५३) घेऊन आंध्रप्रदेशकडे जात होते. दरम्यान धुळे-सोलापूर महामार्गावरील फतियाबाद गावाजवळ येताच ट्रकने रॉंग साईडने येणाऱ्या उसाच्या ट्रॅक्टरला धडक दिली. यात ट्रॅक्टरचालकाने प्रसंगावधान राखून घटनास्थळावरून पळ काढला. पण ही धडक इतक्या जोराची होती की ट्रॅक्टरचे दोन तुकडे झाले; तर ट्रॉलीतील ऊस थेट ट्रकच्या केबिनमध्ये घुसला. त्यामुळे केबिनमध्ये बसलेले ट्रकचालक संतोष रणखांबे व एकनाथ साबळे हे गंभीर जखमी झाले. यात एकनाथ साबळे यांच्या डोळ्याला मार लागला आहे.

अपघाताची माहिती मिळताच दौलताबाद पोलीस ठाण्याचे पोलीस कर्मचारी शरद बच्छाव, पचलोरे, के. पी. काबळे, सचिन त्रिभुवन यांनी घटनास्थळी धाव घेतली. जखमींना रुग्णालयात दाखल करण्यात आले. दोन्ही अपघातग्रस्त वाहने मंगळवारी दुपारपर्यंत महामार्गावरच होती. या घटनेची नोंद दौलताबाद पोलीस ठाण्यात झाली आहे. ट्रॅक्टरचे दोन तुकडे झाले, त्यात ट्रॅक्टरचालक व त्याच्यासमवेत असलेले अन्य साथीदार यांनी घटनास्थळावरून पळ काढला. ट्रॅक्टरच्या नंबरवरून पुढील तपास पोलीस करीत आहेत.

-----------

फोटो :