औरंगाबाद-जळगाव महामार्गावर दोन तास ट्राफिक जाम

फुलंब्री : औरंगाबाद ते जळगाव राष्ट्रीय महामार्गावर चौका घाटाखाली एक ट्रक अचानक बंद पडल्याने दोन तास वाहतुकीचा खोळंबा झाला होता. यात हजारो प्रवाशांना विनाकारण वाहतूक कोंडीचा सामना करावा लागला आहे. शुक्रवारी सायंकाळी चार ते सहा वाजेपर्यंत हा खेळ सुरू होता.

औरंगाबाद-जळगाव महामार्गाच्या रुंदीकरणाचे काम सुरू आहे. जागोजागी रस्त्याची एक बाजू बंद करण्यात आली. त्यामुळे दुसऱ्या बाजूने वाहने सोडली जातात. त्यात महामार्गावर सायंकाळी वाहनांची गर्दी वाढते. त्यात अरूंद रस्त्यातून वाहने घेऊन जाताना चालकांना जीवघेणी कसरत करावी लागते. अशातच चौका घाटातून खाली असलेल्या वृंदावन हॉटेल नजीक अचानक एक ट्रक बंद पडला. आधीच एकेरी असलेल्या रस्त्याच्या मधोमध ट्रक बंद झाल्याने मोठी तारांबळ उडाली. परिणामी दोन्ही बाजूने येणारी वाहनांची रांगच रांग लागली. त्यामुळे येथे वाहतूक ठप्प झाली आहे.