दोन भरधाव ट्रक समोरासमोर धडकल्या, एक चालक ठार

एका ट्रकची समोरची कँबीन निखळून रोडवर पडली. तर दुसरा ट्रक   रस्त्याच्या खाली जाऊन पलटी झाला.

पैठण - पैठण पाचोड रोडवर आखतवाडा गावाजवळ भरधाव असलेल्या दोन ट्रक समोर समोर धडकून झालेल्या अपघातात एका चालकाचा जागीच मृत्यू झाला आहे. हा अपघात बुधवारी सायंकाळी झाला. अपघातात जखमी झालेल्या दुसऱ्या चालकास पोलिसांनी उपचारासाठी पैठण येथील शासकीय रुग्णालयात हलवले आहे. 

पैठण पाचोड रोडवर आखतवाडा गावाजवळ असलेल्या जायकवाडीच्या डाव्या कालव्याच्या पुलाच्या वळणावर सायंकाळी दोन भरधाव ट्रक समोरासमोर भिडल्या. अपघाताची  भिषणता ईतकी होतीकी, एका ट्रकची समोरची कँबीन निखळून रोडवर पडली. तर दुसरा ट्रक   रस्त्याच्या खाली जाऊन पलटी झाला. या अपघातात आयशर ट्रक क्र जीजे १२ बीवाय ०१७८ चा चालक मोहनलाल मिश्रीलाल फुलवारी (३२) रा. भारतनगर गांधीधाम कच्छ गुजरात हा जागीच ठार झाला.   ट्रक क्र. एम एच १६ सीसी ९९२१ चा चालक राजेंद्र रावसाहेब सुळ (२७) रा. खेड ता. कर्जत जी.अहमदनगर हा गंभीर जखमी झाला.

अपघाताची खबर आखतवाड्याचे उपसरपंच विवेक म्हस्के यांनी पैठण पोलिसांना दिली . तातडीने पोलीस निरीक्षक किशोर पवार, फौजदार रामकृष्ण सागडे, सतीश भोसले, सुधीर वाव्हळ, मनोज वैद्य, गोपाळ पाटील, आदींनी घटनास्थळी जाऊन जखमी चालकास उपचारासाठी रूग्णालयात हलवले. अपघातामुळे खोळंबलेली वाहतूक सुरळीत केली. या अपघाताची नोंद पैठण पोलीस ठाण्यात घेण्यात आली आहे.