दुचाकींची समोरासमोर धडक; एक जण ठार

खुलताबाद : खुलताबाद-फुलंब्री मार्गावरील भडजी गावाजवळ भरधाव दुचाकींची समोरासमोर धडक झाली. या अपघातात एक जण ठार झाला, तर दुचाकीवरील अन्य तीन जण जखमी झाले आहेत. साईनाथ रामराव कसारे असे अपघातात मृत्यू झालेल्या व्यक्तीचे नाव आहे.

खुलताबाद येथून आठवडी बाजार करून साईनाथ रामराव कसारे (रा. सोनखेडा) हे दुचाकीवरून (क्र. एमएच २० सीई ०५८९) मूळगावी सोनखेडाकडे निघाले होते, तर गंगापूर तालुक्यातील कायगाव येथील तिघेजण एकाच दुचाकीवरून (क्र. एमएच......... सीजे ६२५१) फुलंब्रीकडून खुलताबादकडे येत होते. दरम्यान भडजी गावालगत असलेल्या स्टोन क्रेशरसमोरच दोन्ही भरधाव दुचाकींची समोरासमोर जोरदार धडक झाली. यात साईनाथ कसारे हे गंभीर जखमी झाले. घटनास्थळावर धावत आलेल्या नागरिकांनी साईनाथ कसारे यांना व अन्य तीन जणांना खासगी वाहनाने खुलताबाद ग्रामीण रुग्णालयात दाखल केले. साईनाथ यांची प्रकृती गंभीर झाल्याने त्यांना पुढील उपचारासाठी औरंगाबादकडे हलविण्यात आले. मात्र, वाटेतच त्याची प्राणज्योत मालवली. अपघातात जखमी झालेल्या अन्य तिघांवर खुलताबाद ग्रामीण रुग्णालयात उपचार सुरू आहेत.

फोटो : खुलताबाद-फुलंब्री मार्गावरील भडजी येथे दुचाकीच्या अपघातात वाहनांचा असा चुराडा झाला.

240421\img-20210424-wa0191_1.jpg

अपघातात दुचाकींचा झालेला चुराडा