विद्यापीठाच्या पदवी प्रथम वर्ष, पीजी परीक्षा २२ डिसेंबरपासून

४ जिल्हयात ११० केंद्रावर १६ हजार ९१३ परीक्षार्थी

औरंगाबाद - डॉ.बाबासाहेब आंबेडकर मराठवाडा विद्यापीठाच्या पदव्युत्तर अभ्यासक्रमाच्या (पीजी) हिवाळी सत्र परीक्षा येत्या २२ डिसेंबरपासून सुरु होणार आहेत. ४ जिल्ह्यातील ११० परीक्षा केंद्रावर १६ हजार ९१३ विद्यार्थी परीक्षा देणार असल्याची माहिती परीक्षा व मूल्यमापन मंडळाचे संचालक डॉ. गणेश मंझा यांनी दिली.

कुलगुरु डॉ.प्रमोद येवले यांच्या मार्गदर्शनाखाली परीक्षेसाठी १० भरारी पथकांची स्थापना करण्यात आली आहे. विद्यार्थ्यांनी कॉपीमुक्त वातावरणात व शांतपणे पेपर द्यावेत असे आवाहनही त्यांनी केले आहे. बी.ए., बी.एस्सी व बी.कॉम अभ्यासक्रमाची द्वितीय व तृतीय वर्षाची परीक्षा नोव्हेंबर महिन्यात सुरू झाल्या. पदवी व पदव्यूत्तर व्यावसायिक अभ्यासक्रमाची परीक्षा जानेवारीच्या दुसऱ्या आठवडयात होणार आहे. बी.ए., बी.एस्सी व बी.कॉम प्रथम सत्राच्या परीक्षाही २२ डिसेंबरपासून होणार आहेत. 

पदव्युत्तर परीक्षेसाठी सर्वांधिक ९ हजार ८०२ विद्यार्थी विज्ञान शाखेतून (एम.एस्सी) परीक्षा देणार आहेत. कला व सामाजिकशास्त्र शाखेतून ३ हजार ८२५ तर वाणिज्य विद्याशाखेतून ३ हजार २८६ जण परीक्षा देणार आहेत. सकाळी १० ते १ तर दुपारी २ ते ५ दरम्यान पेपर होणार आहेत.