कडबा कुट्टी यंत्रात बिघाड झाल्याने उडालेला पत्रा लागून तरुणाचा मृत्यू

मोलमजुरी करून मोठ्या कष्टाने खरेदी केलेली कडबा कुट्टी मशीन चालवून आपली उपजीविका भागविणारा बनोटी येथील तरुण गजानन दत्तू सोनवणेचा मृत्यू झाल्याने सर्वत्र हळह‌ळ व्यक्त केली जात आहे. गुरुवारी सकाळी लवकर उठून तीस किलोमीटर अंतरावरील नेरी (जि. जळगाव) येथील निंबा वामन पाटील यांच्या शेतात कडबा कुट्टी मशीनने कडब्याचा बारीक चारा करीत असताना मशीनमध्ये अचानक बिघाड झाली. काही कळण्याच्या आत मशीनचा पत्रा उडून अंगावर आणि चेहऱ्यावर जोरदार फटका बसला. यात गजानन हे गंभीर जखमी झाले. यावेळ‌ी शेतकरी मयूर व संजय अहिरे, ज्ञानेश्वर जंजाळ यांनी जवळील चाळीसगाव येथील खाजगी रुग्णालयात दाखल करण्यात आले. पुढील उपचारासाठी दुसरीकडे हलविताना वाटेतच गजानन सोनवणे यांचा मृत्यू झाला. पाचोरा येथील वैद्यकीय अधिकारी अमित साळुंके यांनी मृत घोषित करीत उत्तरीय तपासणी केली. बनोटी येथील स्मशानभूमीत शुक्रवारी त्यांच्यावर अंत्यसंस्कार करण्यात आले. त्याच्या पशात आई, वडील, पत्नी आणि दोन मुले असा परिवार आहे.

फोटो : बनोटी येथील मयत तरुण गजानन दत्तू सोनवणे.