जुन्या वादातून तरुणाचा चाकूने भोसकून खून

औरंगाबाद : किरकोळ कारणावरून मित्रासोबत झालेल्या वादातून एका २१ वर्षीय तरुणाचा चाकूने भोसकून खून करण्यात आल्याची घटना एसबीओए शाळेसमोर मयूर पार्क येथील तुळजाभवानी चौकात शुक्रवारी रात्री १० वाजेच्या सुमारास घडली. पोलिसांनी एका संशयिताला ताब्यात घेतल्याचे सूत्राने सांगितले. यश जयंत महेंद्रकर (रा. नवजीवन कॉलनी, एन-१२, हडको), असे खून झालेल्या तरुणाचे नाव आहे.

प्राप्त माहितीनुसार, यश महेंद्रकर याचा एका तरुणासोबत जुना वाद होता. यशने शनिवारी रात्री मयूर पार्क येथील तुळजाभवानी चौकात राज नावाच्या तरुणाला तडजोड करण्यासाठी बोलावले होते. यावेळी त्यांच्यात वादावादी सुरू झाली. तेव्हा राजने अचानक यशला चाकूने भोसकले. या घटनेत यश खाली कोसळताच आरोपी घटनास्थळावरून पळून गेले. यानंतर यशला त्याच्या मित्रांनी गंभीर जखमी अवस्थेत मित्रांनी घाटी रुग्णालयात दाखल केले. मात्र, तोपर्यंत उशीर झाला होता. अपघात विभागातील डॉक्टरांनी त्याला मयत घोषित केले. याप्रकरणी पोलिसांनी एका तरुणाला संशयावरून ताब्यात घेतले.

चौकट...

मयूर पार्क परिसरात खळबळ

या घटनेमुळे मयूर पार्क परिसरात खळबळ उडाली असून, रात्री उशिरापर्यंत घटनास्थळावर फॉरेन्सिक पथक नमुने गोळा करीत होते. या घटनेची माहिती मिळताच पोलीस निरीक्षक सचिन इंगोले आणि अन्य अधिकाऱ्यांनी घटनास्थळी आणि घाटी रुग्णालयात धाव घेतली. घटनास्थळी पोलीस बंदोबस्त तैनात करण्यात आला. यशच्या खुनाचे अन्य काही कारण आहे का, यात किती आरोपी आहेत, याचा तपास पोलिसांनी सुरू केला.