Hardik Pandya scripts history in Syed Mushtaq Ali Trophy : एका बाजूला पर्थ कसोटीत यशस्वी-केएल राहुलची दमदार इनिंग तर दुसऱ्या बाजूला IPL मेगा लिलावाची चर्चा सुरु असताना देशांतर्गत क्रिकेटच्या मैदानात तुफान फटकेबाजी करत हार्दिक लक्षवेधून घेतलं आहे. देशांतर्गत टी-२० क्रिकेटमधील क्लास इनिंगसह हार्दिक पांड्यानं हवा केली आहे. त्याने आपल्या धमाकेदार बॅटिंगच्या जोरावर संघाला विजय मिळवून दिला. एवढेच नाही तर जे आतापर्यंत कुणाला जमलं नाही तो पराक्रमही करून दाखवला आहे.
हार्दिक पांड्याची धमाकेदार इनिंग
सय्यद मुश्ताक अली ट्रॉफी स्पर्धेत हार्दिक पांड्याने ३५ चेंडूत नाबाद ७४ धावांची खेळी केली. या स्पर्धेतील पहिल्या दिवशी तिलक वर्मा आणि श्रेयस अय्यरसह ६ फलंदाजांनी शतकी खेळी केल्याचे पाहायला मिळाले. हार्दिक पांड्याला शतकी डाव साधता आला नसला तरी नाबाद ७४ धावांच्या खेळीसह त्याने खास विक्रमाला गवसणी घातली आहे. हार्दिक पांड्यानं भाऊ क्रणाल पांड्याच्या नेतृत्वाखालील बडोदा संघाकडून खेळताना ही धमाकेदार इनिंग खेळली आहे.
तुफान फटकेबाजीशिवाय बॉलिंगमध्येही सोडली छाप
गुजरात विरुद्ध बडोदा यांच्यातील लढतीत हार्दिक पांड्याने ६ चौकार आणि ५ उत्तुंग षटकाराच्या मदतीने ७४ धावांची नाबाद खेळी करत संघाच्या विजयात मोलाचा वाटा उचलला. त्याने जवळपास २११ च्या स्ट्राइक रेटनं या धावा कुटल्या. पांड्याच्या या खेळीच्या जोरावर बडोदा संघाने हा सामना ५ विकेट्स राखून जिंकला. या सामन्यात ४ षटके गोलंदाजी करताना पांड्याने ३७ धावा खर्च करून आर्या देसाईच्या रुपात एक महत्त्वाची विकेट्सही मिळवली.
५००० धावांसह १०० प्लस विकेट्सचा खास रेकॉर्ड
देशांतर्गत टी-२० क्रिकेटमधील या क्लास इनिंगसह हार्दिक पांड्याने टी-२० क्रिकेमध्ये ५००० धावांचा टप्पा पार केला आहे. त्याच्या खात्यात आता ५०६७ धावा जमा आहेत. टी-२० क्रिकेटमध्ये ५००० धावांसह १०० विकेट्स घेणारा हार्दिक पांड्या हा पहिला भारतीय क्रिकेटर ठरला आहे. टी-२० क्रिकेटमध्ये त्याच्या खात्यात १८० विकेट्स जमा आहेत. या यादीत जड्डू दुसऱ्या क्रमांकावर आहे. रवींद्र जडेजानं टी-२० क्रिकेटमध्ये ३६८४ धावांसह २२५ विकेट्स घेतल्या आहेत. अक्षर पटेलच्या खात्यात २९६० धावा आणि १३८ विकेट्स जमा असून इरफान पठाणनं २०२० धावांसह १७३ विकेट्स घेतल्याचा रेकॉर्ड आहे.
Web Title: Hardik Pandya scripts history in Syed Mushtaq Ali Trophy becomes first Indian to achieve huge milestone Know About This Record
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
