AFG vs SL Live : आशिया चषक स्पर्धेतील अफगाणिस्तान विरुद्ध श्रीलंका ही मॅच कमालीची चुरशीची होताना दिसतेय... लाहोर येथे सुरू असलेल्या सामन्यात अफगाणिस्तानला मोठा पाठिंबा मिळतोय आणि त्यांचा खेळही तसा बहरताना दिसला. ३३ व्या षटकापर्यंत श्रीलंकेची सामन्यावर पकड होती, परंतु ग्रह फिरले अन् अफगाणिस्तानने जबरदस्त कमबॅक केले. कुसल मेंडिस ( Kusal Mendis) याचा ९२ धावांवर दुर्दैवी रन आऊट कलाटणी देणारा ठरला. राशीद खानने ६३ धावांत २, तर गुलबदीन नैबने ६० धावांत ४ विकेट्स घेतल्या.
सुपर ४ मध्ये जाण्यासाठी दोन्ही संघाला विजय आवश्यक आहे आणि त्यामुळे कडवी टक्कर पाहायला मिळाली. श्रीलंकेने नाणेफेक जिंकून प्रथम फलंदाजीचा निर्णय घेतला. पथूम निसंका आणि दिमुथ करुणारत्ने यांनी पहिल्या विकेटसाठी ६३ धावा जोडल्या. ११व्या षटकात गुलबदीन नैबने श्रीलंकेला पहिला धक्का देताना करुणारत्नेला ( ३२) बाद केले. कुलस मेंडिस आणि निसंका यांची जोडी जमण्याआधीच तुटली. निसंका ( ४१) नैबच्या गोलंदाजीवर बाद झाला. सदीरा समरविक्रमान ( ३) आज अपयशी ठरला. पण, मेंडिस व चरिथ असलंका यांनी डाव सारवला. दोघांनी चौथ्या विकेटसाठी शतकी भागीदारी केली. ३३व्या षटकापर्यंत सामना श्रीलंकेच्या हातात होता.
सुपर ४ चे समीकरण... ब गटातून बांगलादेशने २ गुणांसह ०.३७३ च्या नेट रनरेटने सुपर ४ मध्ये जागा पक्की केली आहे. दुसऱ्या स्थानासाठी श्रीलंका आणि अफगाणिस्तान यांच्यात चुरस आहे. श्रीलंकेने पहिला सामना जिंकून ०.९५१च्या नेट रन रेट व २ गुणांसह अव्वल स्थान टिकवले आहे, तर अफगाणिस्तानने १ सामना गमावला आहे.