लॉर्ड्स, आयसीसी वर्ल्ड कप 2019 : वर्ल्ड कप स्पर्धेच्या अंतिम सामन्यात यजमान इंग्लंडने चौकारांच्या फरकानं बाजी मारताना जेतेपदाचा मान पटकावला. इंग्लंड आणि न्यूझीलंड यांच्यात झालेला हा सामना निर्धारीत 50 षटकांत 241-241 असा आणि सुपर ओव्हरमध्ये 15-15 असा बरोबरीत सुटला. त्यामुळे सर्वाधिक चौकार मारणाऱ्या इंग्लंडला विजयी घोषित करण्यात आले. या स्पर्धेत भारताच्या रोहित शर्मानं ( 648) सर्वाधिक धावा करणाऱ्या फलंदाजांमध्ये, तर ऑस्ट्रेलियाच्या मिचेल स्टार्कनं ( 27) सर्वाधिक विकेट घेणाऱ्या गोलंदाजांमध्ये अव्वल स्थान पटकावलं. बांगलादेशच्या शकिब अल हसननेही 606 धावा आणि 11 विकेट्स अशी अष्टपैलू कामगिरी केली. त्यामुळे स्पर्धेतील सर्वोत्तम खेळाडूसाठीची चुरस यांच्यात रंगेल असे वाटले होते, परंतु यांच्यापैकी एकालाही तो मान मिळाला नाही.
इंग्लंडच्या विजयात 'परप्रांतियांचा' मोठा वाटा, जाणून घ्या कसा!
भारतीय संघाचे आव्हान उपांत्य फेरीतच संपुष्टात आले असले तरी रोहित शर्मानं ही स्पर्धा गाजवली. त्यानं 9 सामन्यांत 5 शतकांसह 648 धावा केल्या आहेत आणि स्पर्धेतील सर्वाधिक धावा करण्याचा विक्रम त्याच्या नावावर आहे.
यंदाच्या स्पर्धेत कर्णधार म्हणून 500 धावांचा पल्ला पार करणारा तो दुसरा कर्णधार आहे. ऑस्ट्रेलियाच्या अॅरोन फिंचने 507 धावा केल्या आहेत. भारतीय संघाचा कर्णधार विराट कोहली 442 धावांसह तिसऱ्या क्रमांकावर आहे.