ICC ODI World Cup IND vs ENG Live : लखनौच्या एकाना स्टेडियममध्ये सुरू असलेल्या इंग्लंडविरुद्धच्या वन डे वर्ल्ड कप स्पर्धेतील सामन्यात विराट कोहलीने शून्यावर बाद झाला. वर्ल्ड कप स्पर्धेत विराट प्रथमच शून्यावर बाद झाला. सचिन तेंडुलकरच्या ४९ वन डे शतकांच्या विक्रमाची बरोबरी करण्याच्या निर्धाराने कोहली मैदानात उतरला, परंतु एकही धाव न काढता त्याला पॅव्हेलियनमध्ये परतावे लागले.
भारताला चौथ्या षटकात ख्रिस वोक्सने धक्का दिला आणि अप्रतिम चेंडूवर शुबमन गिलचा ( ९) त्रिफळा उडवला. विराट कोहलीही शून्यावर डेव्हिड विलीच्या गोलंदाजीवर मिड ऑफला बेन स्टोक्सच्या हाती झेल देऊन परतला. रोहित शर्माने संयमी खेळ केला होता, परंतु श्रेयस अय्यर ( ४) पुन्हा अपयशी ठरला. वोक्सच्या चेंडूवर पुल मारण्याच्या प्रयत्नात तो मिड ऑनला मार्क वूडच्या हाती सहज झेल देऊन परतला. रोहितने ६६ चेंडूंत अर्धशतक पूर्ण केले आणि आंतरराष्ट्रीय क्रिकेटमध्ये १८००० धावांचा टप्पाही ओलांडला. वर्ल्ड कप स्पर्धेत सर्वाधिक वेळा ५०+ धावा करणआऱ्या फलंदाजांमध्ये रोहितने ( १२) संयुक्तपणे विराटसह दुसरे स्थान पटकावले. सचिन तेंडुलकर ( २१) अव्वल स्थानी आहे.
कोहली शून्यावर बाद झाला आणि जेव्हा तो पॅव्हेलियनमध्ये परतला तेव्हा निराश झाला. त्याच्या बाद झाल्यानंतरचा एक व्हिडीओ व्हायरल झाला आहे. त्यात निराशेने ग्रासलेल्या कोहलीने अत्यंत रागाच्या भरात ड्रेसिंग रूमच्या सोफ्यावर काही ठोसे मारले.