Pollard Umpire Funny Video, IPL 2022 MI vs KKR: अनेक सामन्यांनंतर संधी मिळालेल्या व्यंकटेश अय्यर (४३) आणि पॅट कमिन्स (३ बळी) यांच्या दमदार कमबॅकमुळे KKR ने मुंबई इंडियन्सला ५२ धावांनी पराभूत केले. मुंबईकडून जसप्रीत बुमराहने पाच बळी घेत भेदक मारा केला. पण त्याचा पराक्रम मुंबईला सामना जिंकवून देऊ शकला नाही. याच सामन्यात किरॉन पोलार्डच्या बाबतीत एक मजेशीर प्रसंग घडला. रन अप घेऊन चेंडू टाकताना पोलार्डने थेट अंपायरलाच चेंडू मारला.
डावाचे १०वे षटक पोलार्ड टाकत होता. नितीश राणा चांगलाच फॉर्ममध्ये होता. त्यामुळे फटकेबाजी होणार अशी अपेक्षा साऱ्यांनाच होती. त्यावेळी षटकाच्या पाचव्या चेंडूवर एखादा नवा प्रयोग करण्याचा विचार पोलार्डचा होता. पण प्रत्यक्षात मात्र जसा पोलार्ड चेंडू टाकायला गेला, तसा चेंडू हातून सटकला आणि थेट अंपायरला जाऊन लागला. घडलेल्या प्रकारानंतर पोलार्डने हसतहसत अंपायरची माफी मागितली. रोहित शर्मानेही जवळ जात अंपायरची विचारपूस केली. त्यानंतर पुढे खेळ सुरू झाला. पाहा Video-
दरम्यान, सामन्यात प्रथम फलंदाजी करताना कोलकाताकडून व्यंकटेश अय्यर आणि नितीश राणा या दोघांनी प्रत्येकी ४३ धावा केल्या. त्यामुळे KKRची धावसंख्या १६५ पर्यंत पोहोचली. जसप्रीत बुमराहने IPL कारकिर्दीत पहिल्यांदाच ५ बळी टिपले. याच्या प्रत्युत्तरात इशान किशनने एकाकी ५१ धावांची झुंज दिली. पण त्याला इतर कोणाचीच साथ लाभली नाही. त्यामुळे मुंबईचा डाव ११३ धावांमध्ये आटोपला आणि KKR ला ५२ धावांनी मोठा विजय मिळाला.