Delhi Capitals vs Kolkata Knight Riders, IPL 2022 Live updates : शार्दूल ठाकूर ( Shardul Thakur) आज पुन्हा एकदा संघासाठी 'लॉर्ड'सारखा धावून आला. कोलकाता नाईट रायडर्सविरुद्धच्या सामन्यात दिल्ली कॅपिटल्सच्या अष्टपैलू शार्दूलने पहिली फलंदाजीत योगदान दिले. त्यानंतर एक अफलातून झेल घेत KKR ला मोठा धक्का दिला. २१६ धावांच्या लक्ष्याचा पाठलाग करायला मैदानावर उतरलेल्या KKR ला पहिल्याच षटकात धक्का बसला असता, परंतु अजिंक्य रहाणेचं ( Ajinkya Rahane) नशीब बलवान म्हणून तो तीनवेळा वाचला. पण, Lord Shardul ने नशीबाची चक्र फिरवली अन् त्याला माघारी जाण्यास भाग पाडले.
प्रथम फलंदाजी करताना दिल्ली कॅपिटल्सने ५ बाद २१५ धावांचा डोंगर उभा केला. सलामीवीर पृथ्वी शॉ व डेव्हिड वॉर्नर यांनी पहिल्या विकेटसाठी ९३ धावांची भागीदारी करताना मजबूत पाया रचला. पृथ्वीने २९ चेंडूंत ७ चौकार व २ षटकारांसह ५१ धावा केल्या. वॉर्नरनेही आयपीएल २०२२मधील पहिले अर्धशतक झळकावताना ४५ चेंडूंत ६ चौकार व २ षटकारांसह ६१ धावा केल्या. कर्णधार रिषभ पंत ( २७), अक्षर पटेल ( २२*) व शार्दूल ठाकूर ( २९*) यांनीही योगदान दिले. कोलकाताच्या सुनील नरीनने दोन विकेट्स घेतल्या.
लक्ष्याचा पाठलाग करताना मुस्ताफिजूर रहमानने टाकलेल्या पहिल्या षटकाच्या पहिल्या चेंडूवर अजिंक्य रहाणेसाठी caught behind ची अपील झाली आणि अम्पायरने त्याला बाद दिले. रहाणेने त्वरीत DRS घेतला आणि त्यात चेंडू व बॅट यांच्यात संपर्क झाला नसल्याचे समोर आले. दुसऱ्या चेंडूवर LBW ची अपील झाली आणि पुन्हा अम्पायरने आऊट दिले. रहाणेने पुन्हा DRS घेतला आणि चेंडू पॅडवर आदळण्यापूर्वी बॅटची किनार घेतल्याचे समोर आले आणि रहाणे पुन्हा वाचला. तिसऱ्या चेंडूवर चेंडू व बॅट मध्ये संपर्क झाला आणि झेल टिपला गेला, परंतु कोणीच अपील केले नाही आणि रहाणे वाचला.
पण, आज दिल्लीकडून खेळण्याची संधी मिळालेल्या खलिल अहमदने KKRला पहिला धक्का देताना वेंकटेश अय्यरला ( १८) बाद केले. त्यानंतर पुढच्याच षटकात अहमदने अजिंक्यची विकेट काढली. अजिंक्यने टोलावलेला चेंडू उत्तुंग उडाला आणि शार्दूलने उलट धाव घेत तो अप्रतिमरित्या टिपला. चेंडू हातात आल्यानंतरही दोन-तीन वेळा सुटेल असे चित्र दिसत होते, परंतु शार्दूलने लक्ष विचलित केले नाही आणि अजिंक्यला ( ८) माघारी जाण्यास भाग पाडले.
पाहा व्हिडीओ...