Gujarat Titans vs Mumbai Indians Live । अहमदाबाद : सध्या आयपीएलमध्ये मुंबई इंडियन्स आणि गुजरात टायटन्स यांच्यात सामना खेळवला जात आहे. अर्जुन तेंडुलकरने रिद्धिमान साहाला तंबूत पाठवून संघाला पहिला बळी मिळवून दिला. पण हार्दिक पांड्या आणि शुबमन गिल यांनी पॉवरप्लेत साजेशी खेळी केली. हार्दिक पांड्या १३ धावांवर खेळत असताना पियुष चावलाने हार्दिक पांड्याला आपल्या जाळ्यात फसवले. सोपा चेंडू असल्याचे पाहून हार्दिकने मोठा फटका मारला पण सूर्या त्याच्या वाटेत आडवा आला.
पॉवरप्लेमध्ये ५० धावा खेचल्यानंतर सातव्या षटकातील पहिल्याच चेंडूवर पियुष चावलाने प्रतिस्पर्धी संघाचा कर्णधार हार्दिक पांड्याला बाहेरचा रस्ता दाखवला. पियुष चावलाने बॅटखाली टाकलेला चेंडू सीमारेषेबाहेर घालवण्याच्या प्रयत्नात हार्दिक फसला अन् बाद झाला. सीमारेषेवर अप्रतिम झेल घेऊन सूर्यकुमार यादवने यजमान संघाला दुसरा मोठा झटका दिला. हार्दिक आज धावा करण्यासाठी संघर्ष करताना दिसला. तो १४ चेंडूत १३ धावांवर खेळत होता. पण एकच चौकार मारण्यात पांड्याला यश आले होते. सततच्या निर्धाव चेंडूमुळे त्याच्यावर दबाव आला अन् त्याने चावलाविरूद्ध आक्रमण होण्याचा निर्णय घेतला. पण या लढाईत फिरकीपटू पियुष चावलाचा विजय झाला.
अहमदाबाद येथील नरेंद्र मोदी क्रिकेट स्टेडियमवर मुंबई आणि गुजरात यांच्यात सामना खेळवला जात आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"