ICC ODI World Cup ENG vs SL Live : श्रीलंकेने २००७ च्या वर्ल्ड कप स्पर्धेपासून सुरू असलेली परंपरा कायम राखताना इंग्लंडला पराभूत केले. २००७, २०११, २०१५, २०१९ आणि २०२३ मध्ये झालेल्या वन डे वर्ल्ड कप स्पर्धेत श्रीलंकेने इंग्लंडवर सहज विजय मिळवला आहे. १९९६नंतर इंग्लंड वर्ल्ड कप स्पर्धेत प्रथमच सलग तीन सामने हरला आहे. श्रीलंकेने २५.४ षटकांत ८ विकेट्स राखून दणदणीत विजय मिळवून गुणतालिकेत आगेकूच केलीच शिवाय नेट रन रेटही प्रचंड सुधारला.
इंग्लंडने बिनबाद ४५ वरून संपूर्ण संघ ३३.२ षटकांत १५६ धावांत गमावले. १११ धावांत इंग्लंडने १० गडी गमावले. बेन स्टोक्सने सर्वाधिक ४३ ( ७३ चेंडू) धावा केल्या. जॉनी बेअरस्टो ( ३०) व डेविड मलान ( २८) यांनी सुरुवात चांगली केली होती. पण, त्यानंतर लाईन लागली. मोईन अली ( १५) व डेव्हिड विली ( १४) यांनीही दुहेरी आकडा गाठला. लाहिरु कुमारा ( ३-३५), कसून रजिथा ( २-३६), पुनरागमन करणारा अँजेलो मॅथ्यूज ( २-१४) आणि महीश थीक्षणा ( १-२१) यांनी सुरेख गोलंदाजी केली.
माफक लक्ष्याचा पाठलाग करताना श्रीलंकाही डगमगली. कुसल परेरा ( ४) व कुसल मेंडिस ( ११) हे डेव्हिड विलीच्या गोलंदाजीवर बाद झाले. पण, त्यानंतर सदीरा समरविक्रमा आणि पथूम निसंका यांनी तिसऱ्या विकेटसाठी १२२ चेंडूंत नाबाद १३७ धावा जोडून श्रीलंकेचा विजय पक्का केला. श्रीलंकेने २५.४ षटकांत २ बाद १६० धावा केल्या. समरविक्रमा ५४ चेंडूंत ७ चौकार व १ षटकारासह ६५ धावांवर नाबाद राहिला. निसंका ८३ चेंडूंत ७ चौकार व २ षटकारांसह ७७ धावांवर नाबाद राहिला.
भारतीय संघ ५ विजय व १० गुणांसह आघाडीवर आहे. दक्षिण आफ्रिका व न्यूझीलंड प्रत्येकी ८ गुणांसह आणि ऑस्ट्रेलिया ६ गुणांसह टॉप फोअरमध्ये आहे. आजपर्यंत सर्वच संघांचे ५ सामने झाले आहेत. पाकिस्तान, अफगाणिस्तान व श्रीलंका हे ४ गुणांसह अजूनही शर्यतीत आहेत. इंग्लंड, बांगलादेश व नेदरलँड्स यांना ५ पैकी १ सामना जिंकता आल्याने त्यांचे आव्हान संपल्यात जमा आहे. आता ते इतरांचे गणित बिघडवण्याचे काम करू शकतात.
श्रीलंकेने आजच्या विजयासह नेट रन रेटमध्ये ( -०.२०५) सुधारणा करताना पाचव्या क्रमांकावर झेप घेतली आणि पाकिस्तानला ( -०.४००) सहाव्या क्रमांकावर ढकलले. इंग्लंडचा नेट रन रेट ( -१.६३४) आणखी पडला आणि ते नवव्या क्रमांकावर गेले. बांगलादेश ( -१.२५३) आणि अफगाणिस्तान ( -०.९६९) हे त्यांच्या पुढे आहेत. श्रीलंकेला पुढील ४ सामन्यांत अफगाणिस्तान, भारत, बांगलादे व न्यूझीलंडचा सामना करायचा आहे आणि त्यांना सेमी फायनलमध्ये ४ सामने जिंकून प्रवेश करण्याची संधी आहे.
Web Title: ICC ODI World Cup - Sri Lanka keep their semi-finals qualification hopes alive, Defending champions England at No.9 & Pakistan are down to No. 6 in the Points table
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
