rohit sharma funny video । मुंबई : आयपीएलच्या इतिहासातील १००० वा सामना जिंकून मुंबई इंडियन्सच्या संघाने कमाल केली. अखेरच्या षटकापर्यंत रंगलेल्या या सामन्यात टीम डेव्हिड (tim david) राजस्थानच्या संघासाठी काळ ठरला. तत्पुर्वी, यशस्वी जैस्वालने (yashasvi jaiswal) शानदार शतक ठोकून मुंबईच्या गोलंदाजांना घाम फोडला. संजू सॅमसनने नाणेफेक जिंकून प्रथम फलंदाजी करण्याचा निर्णय घेतला होता. आपल्या कर्णधाराचा निर्णय योग्य ठरवत जैस्वालने एकतर्फी झुंज दिली. एकिकडे मुंबईच्या गोलंदाजांसमोर कोणत्याच राजस्थानच्या फलंदाजाचा टिकाव लागत नव्हता. तर दुसरीकडे जैस्वाल यशस्वी खेळी करून यजमानांचा चांगलाच समाचार घेत होता.
राजस्थान रॉयल्सने निर्धारित २० षटकांत ७ बाद २१२ धावा केल्या. यशस्वी जैस्वालने ६२ चेंडूत १२४ धावांची शानदार शतकी खेळी केली. त्याच्याशिवाय कोणत्याच राजस्थानच्या खेळाडूला २० धावांचा आकडा गाठता आला नाही. मुंबईकडून अर्शद खानने सर्वाधिक ३ बळी घेतले, तर पियुष चावला (२) आणि रिले मेरेडिथ आणि जोफ्रा आर्चर यांना प्रत्येकी १-१ बळी घेण्यात यश आले.
२१३ धावांच्या विशाल आव्हानाचा पाठलाग करताना मुंबईला सुरूवातीला मोठे धक्के बसले. कर्णधार रोहित शर्मा (३) धावा करून वादग्रस्त निर्णयाचा शिकार ठरला. तर इशान किशनला (२८) रविचंद्रन अश्विनने बाहेरचा रस्ता दाखवला. मग कॅमेरून ग्रीन आणि सूर्यकुमार यादव यांनी डाव सावरला आणि विजयाकडे कूच केली. ग्रीनने ४४ तर सूर्याने २९ चेंडूत ५५ धावांची अप्रतिम खेळी केली. अखेरच्या काही षटकांमध्ये तिलक वर्माने सावध खेळी करत टीम डेव्हिडला साथ दिली. डेव्हिडने १४ चेंडूत ४५ धावा करून मुंबईच्या विजयावर शिक्कामोर्तब केला.
रोहितनं चाहत्याची घेतली फिरकी
सामन्यानंतर बर्थ डे बॉय रोहित शर्मा प्रेक्षकांसोबत फोटो काढत होता. फोटो काढण्यासाठी एका चाहत्याने हिटमॅनला फोन दिला असता रोहितने चाहत्याची फिरकी घेतली अन् लवकर फोन माघारी दिलाच नाही. हा मजेशीर व्हिडीओ मुंबई इंडियन्सच्या फ्रँचायझीने शेअर केला आहे.
अखेरच्या षटकात मोठा ट्विस्ट
अखेरच्या षटकात मुंबई इंडियन्सला विजयासाठी १७ धावांचे आव्हान होते. टीम डेव्हिडकडे मुंबईच्या चाहत्यांच्या नजरा लागल्या होत्या. तर संजू सॅमसनने जेसन होल्डरवर विश्वास दाखवत अखेरचे षटक त्याला दिले. होल्डरने टाकलेला पहिलाच चेंडू सीमारेषेबाहेर लावण्यात डेव्हिडला यश आले. खरं तर होल्डरने तिन्ही चेंडू फुल टॉस टाकले, ज्याचा डेव्हिडने पुरेपुर फायदा उचलला. ३ चेंडूत ३ षटकार ठोकून डेव्हिडने राजस्थानला पराभवाची धूळ चारली आणि मुंबईच्या संघाने आपल्या कर्णधाराला वाढदिवसादिवशी विजयी भेट दिली.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"
Web Title: In IPL 2023 MI vs RR match Mumbai Indians won by 6 wickets and 3 balls to spare, captain Rohit Sharma's funny video with fans after the match is going viral
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
