अल अमेरात : अफगाणिस्तान अ संघाने आपला आतापर्यंतचा सर्वांत मोठा आणि धक्कादायक विजय मिळविताना शुक्रवारी बलाढ्य भारत अ संघाला २० धावांनी नमवीत उदयोन्मुख पुरुष आशिया चषक ट्वेंटी-२० स्पर्धेच्या अंतिम फेरीत धडक मारली. संपूर्ण स्पर्धेत अपराजित राहिलेल्या भारताला उपांत्य फेरीत पराभवाचा धक्का बसला. अन्य उपांत्य सामन्यात श्रीलंकेने पाकिस्तानला सात गड्यांनी नमविले.
अफगाणिस्तान अ संघाने प्रथम फलंदाजी करताना २० षटकांत ४ बाद २०६ धावा उभारल्यानंतर भारतीयांना २० षटकांत ७ बाद १८६ धावांवर रोखले. रमनदीप सिंगने ३४ चेंडूंत ८ चौकार व २ षट्कारांसह ६४ धावांची झुंज दिली. आयुष बदोनी (२४ चेंडूंत ३१), नेहाल वधेरा (१४ चेंडूंत २०) यांनीही शर्थीचे प्रयत्न केले. एएम घझानफर (२/१४) याने नियंत्रित मारा केला. त्याआधी, झुबैद अकबरी आणि सेदिकुल्लाह अटल यांच्या ८७ चेंडूंतील १३७ धावांच्या जबरदस्त सलामीच्या जोरावर अफगाणने द्विशतकी मजल मारली. झुबैदने ४१ चेंडूंत ५ चौकार व ४ षट्कारांसह ६४, तर अटलने ५२ चेंडूंत ७ चौकार व ४ षट्कारांसह ८३ धावा कुटल्या. करिम जनतनेही २० चेंडूंत ४ चौकार व २ षट्कारांसह ४१ धावा चोपल्या. भारताकडून रसिख सलामने २५ धावांत ३ बळी घेतले.