India vs New Zealand, 2nd ODI Live : भारतीय संघाने २०२३ मधील दुसरी वन डे मालिका जिंकली. वन डे वर्ल्ड कपच्या तयारीच्या दृष्टीने भारतीय संघासाठी सातत्यपूर्ण कामगिरी महत्त्वाची आहे. गोलंदाजांच्या कामगिरीमुळे भारताला आजचा सामना सहज जिंकता आला. रोहित शर्माने अर्धशतकी खेळी करून विजयात हातभार लावला अन् भारताने मालिकेत २-० अशी विजयी आघाडी घेतली. जागतिक क्रमवारीत नंबर १ असलेल्या न्यूझीलंडला भारताने पराभूत केले. घरच्या मैदानावरील मागील २४ मालिकांमधील भारताचा हा २२ वा मालिका विजय आहे.
युवा फॅन मैदानावर शिरला अन् रोहित शर्माला मारली मिठी, त्यानंतर कॅप्टनच्या कृतीने जिंकले मन
नाणेफेक जिंकून रोहित शर्माने प्रथम गोलंदाजीचा निर्णय घेतला. मोहम्मद शमीने पहिल्याच षटकात धक्का दिल्यानंतर मोहम्मद सिराज, शार्दूल ठाकूर व हार्दिक पांड्या यांनी धक्के दिले. न्यूझीलंडचा निम्मा संघ १५ धावांवर माघारी पाठवला. ग्लेन फिलिप्स, मायकेल ब्रेसवेल व मिचेल सँटरन यांनी संघर्ष करताना न्यूझीलंडला शतकी पल्ला पार करून दिला. पण, भारतीय गोलंदाज आज कमालीच्या फॉर्मात दिसले अन् त्यांनी किवींचा डाव १०८ धावांत गुंडाळला. शमीने सर्वाधिक ३ विकेट्स घेतल्या.
न्यूझीलंडने समोर ठेवलेल्या माफक लक्ष्याचा पाठलाग करताना रोहित शर्मा व शुभमन गिल या जोडीला फार कष्ट घ्यावे लागले नाही. धावा सहजतेने त्यांच्या बॅटीतून निघत होत्या आणि या दोघांनी चौथ्यांदा अर्धशतकी भागीदारी पूर्ण केली. रोहितची फटकेबाजी आज पाहण्यासारखी होती. कर्णधार म्हणून रोहितने वन डे क्रिकेटमध्ये आज १००० धावा पूर्ण केल्या. रोहित शर्माने ५० चेंडूंत ७ चौकार व २ षटकारांसह ५१ धावा करताना भारताच्या विजयाचा पाया मजबूत केला. विराट कोहली पुन्हा एकदा मिचेल सँटनरच्या गोलंदाजीवर फसला अन् यष्टिचीत होऊन ११ धावांवर माघारी परतला. शुभमन ४० धावांवर नाबाद राहिला अन् भारताने ८ विकेट्स राखून सामना जिंकला. भारताने २०.१ षटकांत २ बाद १११ धावा करून विजय मिळवला.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"