भारत विरुद्ध दक्षिण अफ्रिका, आज दूसरा एकदिवसीय सामना रंगणार, पाहा संभाव्य Playing XI

IND vs SA 2nd ODI: दुसरा एकदिवसीय सामना भारतीय वेळेनुसार संध्याकाळी ४.३० वाजता सुरू होईल.

IND vs SA 2nd ODI: भारत आणि दक्षिण आफ्रिका यांच्यातील तीन एकदिवसीय सामन्यांच्या मालिकेतील दुसरा सामना आज होणार आहे. उभय संघांमधील हा सामना गाकबेर्‍हा येथील सेंट जॉर्ज पार्क येथे होणार आहे. केएल राहुलच्या नेतृत्वाखालील भारतीय संघाने पहिला सामना आठ गडी राखून जिंकला होता. अशा स्थितीत दुसरी वनडे जिंकून त्यांना मालिकेवर कब्जा करायचा आहे. एकदिवसीय मालिका जिंकून भारताला गेल्या दौऱ्यात झालेल्या पराभवाचा बदला घेण्याचीही संधी आहे. २०२२ साली दक्षिण आफ्रिकेच्या दौऱ्यावर भारतीय संघाला वनडे मालिकेत ०-३ ने पराभवाचा सामना करावा लागला होता. दुसरा एकदिवसीय सामना भारतीय वेळेनुसार संध्याकाळी ४.३० वाजता सुरू होईल.

दुसऱ्या एकदिवसीय सामन्यासाठी भारतीय संघाच्या प्लेइंग-11 मध्ये बदल होण्याची खात्री आहे कारण श्रेयस अय्यर फक्त पहिल्या सामन्यासाठी उपलब्ध होता. दुसऱ्या वनडेसाठी श्रेयसच्या जागी रिंकू सिंगला प्लेइंग-11 मध्ये स्थान मिळू शकते. रिंकूने टी-२० मध्ये भारतासाठी चमकदार कामगिरी केली आहे आणि आता तो वनडेमध्येही पदार्पण करू शकतो. रिंकूने आंतरराष्ट्रीय स्तरावर टी-20 सामन्यांमध्ये आपली छाप सोडली आहे. दक्षिण आफ्रिकेतील उसळत्या खेळपट्ट्यांवरही त्याची फलंदाजी आरामदायक वाटत होती. रजत पाटीदारही पदार्पण करण्याच्या तयारीत असला तरी त्याच्या आधी रिंकूला संधी मिळू शकते.

Tomorrow India will play the second ODI in 𝐆𝐪𝐞𝐛𝐞𝐫𝐡𝐚.

We ask #TeamIndia members to spell/pronounce the city's name. Did they get it right?😀😎 #SAvINDpic.twitter.com/roxHxvuLUP

— BCCI (@BCCI) December 18, 2023

कागिसो रबाडा आणि अँरिच नोर्किया यांच्या अनुपस्थितीमुळे कमकुवत दिसत असलेल्या दक्षिण आफ्रिकेच्या गोलंदाजी आक्रमणाविरुद्ध साई सुदर्शन, तिलक वर्मा आणि रुतुराज गायकवाडीसारखे युवा खेळाडू दुसऱ्या एकदिवसीय सामन्यात चांगली कामगिरी करतील, अशी आशा भारतीय संघ व्यवस्थापनाला असेल. आवेश खान, मुकेश कुमार आणि अर्शदीप सिंग यांच्यावर पुन्हा एकदा वेगवान गोलंदाजीची मोठी जबाबदारी असेल. तसे पाहिले तर भारतीय संघाला गोलंदाजीत कोणताही बदल करायला आवडणार नाही. फिरकी विभागात अक्षर पटेल आणि कुलदीप यादव संघात राहण्याची शक्यता आहे. त्याचे पर्याय वॉशिंग्टन सुंदर आणि युझवेंद्र चहल यांना संधीची वाट पाहावी लागेल.

दुसऱ्या एकदिवसीय सामन्यात टीम इंडियाचे संभाव्य प्लेइंग-11: केएल राहुल (कर्णधार/विकेटकीपर), रुतुराज गायकवाड, साई सुदर्शन, तिलक वर्मा, संजू सॅमसन, रिंकू सिंग, अक्षर पटेल, मुकेश कुमार, कुलदीप यादव, आवेश खान, अर्शदीप सिंग.

दुस-या एकदिवसीय सामन्यात दक्षिण आफ्रिकेचे संभाव्य प्लेइंग-11: रीझा हेंड्रिक्स, टोनी डी जोर्जी, रॅसी व्हॅन डर डुसेन, एडन मार्कराम (कर्णधार), हेनरिक क्लासेन (यष्टीरक्षक), डेव्हिड मिलर, विआन मुल्डर, अँडिले फेहलुकवायो, केशव महाराज, नांद्रे बर्गर , तबरेझ शम्सी.