India vs South Africa, 2nd Test Live Updates : दक्षिण आफ्रिकेविरुद्धच्या दुसऱ्या कसोटीत भारतीय संघाचा पहिला डाव २०२ धावांवरच गडगडला. कर्णधार लोकेश राहुल ( ५०) व आर अश्विन ( ४६) यांच्या खेळीच्या जोरावर भारतानं समाधानकारक पल्ला गाठला. प्रत्युत्तरात दक्षिण आफ्रिकेची सुरुवात खास झाली नसली तरी कर्णधार डीन एल्गर व किगन पीटरसन यांनी डाव सावरला. पण, दुसऱ्या दिवसाच्या पहिल्या सत्रात शार्दूल ठाकूर 'लॉर्ड'सारखा धावून आला. त्यानं ५ षटकांत ८ धावा देताना तीन विकेट्स घेत टीम इंडियाला सामन्यात कमबॅक करून दिले. त्यानं दोन निर्धाव षटकं टाकली.
मयांक अग्रवाल ( २६), चेतेश्वर पुजारा ( ३) व अजिंक्य रहाणे ( ०) हे आघाडीचे फलंदाज अपयशी ठरल्यानंतर लोकेश राहुलनं हनुमा विहारीसह डाव सावण्याचा प्रयत्न केला. पण, विहारी ( २०) धावांवर माघारी परतला अन् लोकेशही ( ५०) अर्धशतकानंतर बाद झाला. त्यानंतर आर अश्विन व रिषभ पंत यांनी चांगला खेळ केला, परंतु रिषभला फार काळ खेळपट्टीवर टीकता आले नाही. अश्विननं मात्र ५० चेंडूंत ४६ धावा चोपल्या. जसप्रीतनं नाबाद १४ धावा करून संघाला दोनशेपार नेले.
मोहम्मद शमीनं चौथ्या षटकात आफ्रिकेचा सलामीवीर एडन मार्कराम ( ७) याला बाद केले. त्यानंतर कर्णधार डीन एल्गर व किगन पीटरसन यांनी सावध खेळ केला. रिषभ पंतनं आफ्रिकेच्या पीटरसननं १२ धावांवर असताना जीवदान दिले. जसप्रीत बुमराहच्या गोलंदाजीवर उडालेला झेल रिषभकडून सुटला. आफ्रिकेनं दिवसअखेर १ बाद ३५ धावा केल्या होत्या. त्यात दुसऱ्या दिवशीही ही जोडी फॉर्मात दिसत होती. त्यांची २११ चेंडूंतील ७४ धावांची भागीदारी शार्दूल ठाकूरनं संपुष्टात आणली. डीन एल्गर २८ धावांवर ( १२० चेंडू) बाद झाला. पीटरसननं पहिले अर्धशतक पूर्ण करताना संघाला शंभरी पल्ला पार करून दिला.
शार्दूलनं त्यानंतर पीटरसन ( ६२ ) व रॅसी व्हॅन डेर ड्युसन ( १) यांना माघारी पाठवलं. त्याच्या या धक्क्यांमुळे दक्षिण आफ्रिकेची अवस्था ४ बाद १०२ अशी झाली आहे.
Web Title: IND vs SA, 2nd Test Live Updates : Shardul Thakur is destroying the top order of South Africa. Elgar, Petersen and Rassie inside 5 overs, South Africa 102/4 at lunch on Day 2
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
