India vs South Africa 3rd T20I Live Updates : ऋतुराज गायकवाड ( Ruturaj Gaikwad) आणि इशान किशन ( Ishan Kishan) यांच्या उल्लेखनीय कामगिरीनंतर गोलंदाजांनी कमाल केली. भारताने तिसऱ्या ट्वेंटी-२० सामन्यात दक्षिण आफ्रिकेवर विजय मिळवून मालिका जीवंत ठेवली आहे. भारताने या विजयासह मालिकेतील पिछाडी १-२ अशी कमी केली आहे. युजवेंद्र चहल ( Yuzvendra Chahal) ने तीन व हर्षल पटेल ( Harshal Patel) ने चार विकेट्स घेतल्या. ( India vs South Africa 3rd T20I चे संपूर्ण धावफलक पाहण्यासाठी क्लिक करा)
ऋतुराज आणि इशान यांनी वैयक्तिक अर्धशतक झळकवाताना पहिल्या विकेटसाठी ९७ धावा जोडल्या. १०व्या षटकात ऋतुराज ३५ चेंडूंत ७ चौकार व २ षटकारांसह ५७ धावांवर बाद झाला. त्यानंतर श्रेयस अय्यरनेही चांगले फटके मारले, परंतु तो १४ धावांवर माघारी परतला. श्रेयसने इशानसह १८ चेंडूंत ३१ धावा जोडल्या. इशानने ३५ चेंडूंत ५ चौकार व २ षटकारांसह ५४ धावा केल्या. १५व्या षटकात हार्दिक पांड्या १ धावेवर असताना डेव्हिड मिलरने सोपा झेल टाकला. रॅसी व्हॅन डेर ड्यूसेनने टीम इंडियाचा कर्णधार रिषभ पंतला ४ धावांवर जीवदान दिले. पण, प्रेटोरीयसच्या त्याच षटकात पंत ६ धावांवर बाद झाला. दिनेश कार्तिकही ६ धावांवर माघारी परतला. पांड्याने ३१ धावा करताना भारताची धावसंख्या ५ बाद १७९ धावा अशी पोहोचवली.