India vs Sri Lanka Women's Asia Cup 2022 Final : भारतीय महिला संघाने आशिया चषक २०२२ स्पर्धेच्या अंतिम सामन्यात श्रीलंकेच्या महिला संघावर निर्विवाद वर्चस्व गाजवले. रेणुका सिंगने ( Renuka Singh) धक्क्यांमागून धक्का देताना श्रीलंकेची अवस्था ५ बाद १६ अशी केली. त्यात श्रीलंकेच्या दोन्ही ओपनर्सना घाई नडली आणि त्या रन आऊट झाल्या. रेणुकाने ३-१-५-३ अशी उल्लेखनीय कामगिरी केली. राजश्री गायकवाड व स्नेह राणा यांनी प्रत्येकी दोन विकेट्स घेतल्या.
हरमनप्रीत कौरच्या नेतृत्वाखाली खेळणाऱ्या भारतीय संघासह थायलंड, पाकिस्तान व श्रीलंका यांनी आशिया चषक स्पर्धेच्या उपांत्य फेरीत प्रवेश केला होता. भारतीय संघाने ६ पैकी ५ सामने जिंकून १० गुणांसह तालिकेत अव्वल स्थान पटकावताना उपांत्य फेरीत धडक मारली. पाकिस्तानी महिलांनीही १० गुणांसह अंतिम चार संघांत स्थान पटकावले, परंतु नेट रन रेटमुळे त्यांना दुसऱ्या स्थानावर समाधान मानावे लागले. श्रीलंका ८ गुणांसह तिसऱ्या व थायलंड ६ गुणांसह चौथ्या क्रमांकावर राहिले. भारतीय महिलांनी उपांत्य फेरीत थायलंडवर आणि श्रीलंकेने रोमहर्षक सामन्यात पाकिस्तानवर विजय मिळवून फायनल गाठली.
अंतिम सामन्यात श्रीलंकेने नाणेफेक जिंकून प्रथम फलंदाजीचा निर्णय घेतला. तिसऱ्याच षटकात कर्णधार चमारी अट्टापटू ( ६) रन आऊट झाली. रिचा घोष व रेणुका सिंग यांनी सुरेख क्षेत्ररक्षण केले. त्यानंतर आलेल्या हर्षिता समरविक्रमा ( १), अनुष्का संजिवनी ( ० ) व हसिनि परेरा ( ०) या रेणुका सिंगच्या षटकात सलग तीन चेंडूंवर बाद झाल्या. अनुष्का रन आऊट झाल्याने रेणुकाची हॅटट्रिक झाली नाही. सहाव्या षटकात रेणुकाने तिसरी विकेट घेताना कविशा दिल्हारीला ( ६) बाद केले आणि श्रीलंकेचा निम्मा संघ १५ धावांत तंबूत परतला.
राजश्वरी गायकवाडने श्रीलंकेच्या निलक्षी डी सिल्व्हाचा ( ६) त्रिफळा उडवून सहावा धक्का दिला. स्नेह राणाने ७ वा धक्का देताना मल्शा स्नेहानीची विकेट घेतली. ओशादी रणसिंघे खिंड लढवत होती, परंतु गायकवाडने १३ धावांवर तिला त्रिफळाचीत केले. इनोका रनविराने २२ चेंडूंत नाबाद १८ धावा करताना श्रीलंकेला ९ बाद ६५ धावांपर्यंत पोहोचवले.
Web Title: IND vs SL Asia Cup Final : India needs 66 runs to win the Women's Asia Cup 2022, fantastic bowling performance led by Renuka Singh
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
