India vs West Indies 1st T20I Live Updates : भारतीय संघाने पहिल्या ट्वेंटी-२० सामन्यात वेस्ट इंडिजवर विजय मिळवला. रोहित शर्मा ( Rohit Sharma) व दिनेश कार्तिक ( Dinesh Karthik) यांच्या दमदार फटकेबाजीच्या जोरावर भारताने आव्हानात्मक धावसंख्या उभी केली. त्यानंतर भारतीय गोलंदाजांनी त्यांची भूमिका चोख पार पाडली. आर अश्विन व रवी बिश्नोई या फिरकीपटूंनी प्रत्येकी दोन विकेट्स घेत विंडीजचा डाव डळमळीत केला. अर्शदीप सिंगनेही दोन विकेट्स घेतल्या. कर्णधार म्हणून रोहित शर्माचा हा ५०वा विजय ठरला.
रोहित शर्माने ( Rohit Sharma) अर्धशतकी खेळी करून टीम इंडियाचा पाया सेट केला होता, परंतु एकामागून एक फलंदाज माघारी परतल्याने १५ षटकांत ५ बाद १२७ अशी अवस्था झाली होती. दिनेश कार्तिक ( Dinesh Karthik) मैदानावर आला अन् फटकेबाजीला सुरुवात झाली. त्याच्या वादळी खेळीच्या जोरावर भारताने ६ बाद १९० धावांपर्यंत मजल मारली. सूर्यकुमार यादव ( २४), श्रेयस अय्यर ( ०), रिषभ पंत ( १४), हार्दिक पांड्या ( १) व रवींद्र जडेजा ( १६) यांनी निराश केले. रोहित ४४ चेंडूंत ७ चौकार व २ षटकारांसह ६४ धावांवर बाद झाला. कार्तिकने धमाकेदार खेळ केला. कार्तिकने १९ चेंडूंत ४ चौकार व २ षटकारांसह नाबाद ४१ धावा केल्या. अश्विन १३ धावांवर नाबाद राहिला आणि भारताने ६ बाद १९० धावा केल्या.
७व्या किंवा त्याच्या खालच्या क्रमांकावर येऊन ट्वेंटी-२०त भारतासाठी दिनेक कार्तिकने केलेल्या नाबाद ४१ धावा ही दुसरी सर्वोत्तम वैयक्तिक खेळी ठरली. रवींद्र जडेजाने २०२०मध्ये ऑस्ट्रेलियाविरुद्ध नाबाद ४४ धावा केल्या होत्या. कार्तिकने महेंद्रसिंग धोनीचा ( ३८ धावा वि. इंग्लंड, २०१२) विक्रम मोडला. कार्तिक व आर अश्विन यांनी ७व्या विकेटसाठी ५९ धावांची भागीदारी केली आणि ही भारताकडून दुसरी सर्वोत्तम भागीदारी ठरली. यापूर्वी दिनेश कार्तिक व कृणाल पांड्या यांनी २०१९मध्ये न्यूझीलंडविरुद्ध नाबाद ६३ धावा चोपल्या होत्या.