India vs West Indies 1st Test Live : भारतीय संघाने पहिल्या कसोटी सामन्यात निर्विवाद वर्चस्व गाजवलेले पाहायला मिळतेय. आर अश्विन आणि रवींद्र जडेजाच्या फिरकी माऱ्यानंतर युवा खेळाडू यशस्वी जैस्वाल आणि कर्णधार रोहित शर्माने विंडीजला बॅकफूटवर फेकले. यशस्वीने पदार्पणात अर्धशतक झळकावून तीन मोठे विक्रम नोंदवले अन् रोहितसह भारतासाठी १७ वर्षांनंतर मोठा विक्रम नोंदवला.
वेस्ट इंडिजविरुद्धच्या पहिल्या कसोटीच्या पहिल्या दिवसाचा खेळ भारताच्या नावावर राहिला. कर्णधार क्रेग ब्रेथवेट ( २०) आणि तागेनारायण चंद्रपॉल ( १२ ) यांना आर अश्विनने माघारी पाठवले. शार्दूल ठाकूरने रेयमंड रेइफर ( २) ची विकेट मिळवली आणि जडेजाने जेरमेन ब्लॅकवूड ( १४) आणि जोशुआ डा सिल्वा ( २) यांना बाद करून विंडीजचा निम्मा संघ ७६ धावांत तंबूत पाठवला. जेसन होल्डर ( १८) व पदार्पणवीर एलिक अथानाझे ( ४७) यांनी सहाव्या विकेटसाठी १०८ चेंडूंत ४१ धावा जोडल्या. विंडीजचा संघ १५० धावांत तंबूत परतला. अश्विनने २४.३-६-६०-५ अशी स्पेल टाकली. रवींद्र जडेजाने ३ तर मोहम्मद सिराज व शार्दूल ठाकूर यांनी प्रत्येकी १ विकेट घेतल्या.
पदार्पणात ५०+ धावा करणारा यशस्वी हा तिसरा युवा भारतीय फलंदाज ठरला. अब्बास बेग यांनी १९५९ मध्ये इंग्लंडविरुद्ध २० वर्ष व १२६ दिवसांचा असताना आणि वॉशिंग्टन सुदंरने २०२१ मध्ये ऑस्ट्रेलियाविरुद्ध २१ वर्ष व १०२ दिवसांचा असताना हा पराक्रम केला होता. यशस्वी २१ वर्ष व १९६ दिवसांचा आहे.