India vs West Indies, 2nd ODI Live Updates : शे होपने ( Shai Hope) त्याच्या १००व्या वन डे सामन्यात शतक झळकावण्याचा पराक्रम केला. खेळपट्टीवर शड्डू ठोकून त्याने भारतीय गोलंदाजांचा समाचार घेतला. वैयक्तिक खेळीसह त्याने सहकाऱ्यांसोबत विविध विकेट्ससाठी मजबूत भागीदारी केली. कायले मेयर्स, शामार्ह ब्रुक्स व कर्णधार निकोलस पूरन यांच्यासह त्याने शतकी भागीदारी करताना धावांचा वेग मंदावू दिला नाही. पूरन ७४ धावांवर माघारी परतल्यानंतर होपने अखेरपर्यंत खिंड लढवली. होपने १३ वे शतक झळकावताना वन डे क्रिकेटमध्ये अनोख्या 'डबल सेंच्युरी'ची नोंद केली. त्याच्या शतकी खेळीच्या जोरावर विंडीजने भारतासमोर तगडे आव्हान उभे केले आहे.
१००वा वन डे सामना खेळणाऱ्या शे होप आणि कायले मेयर्स यांनी विंडीजला आश्वासक सुरूवात करून दिली. मोहम्मद सिराज, आवेश खान यांचा जलद मारा ही दोघं सहज परतवून लावताना दिसत होते. पण, १०व्या षटकात दीपक हुडा गोलंदाजीला आला अन् पहिल्याच चेंडूवर विकेट घेतली. मेयर्स २३ चेंडूंत ६ चौकार व १ षटकार मारून ३९ धावांवर बाद झाला आणि पहिल्या विकेटसाठी ६५ धावांची भागीदारी संपुष्टात आणली. होप आणि शामार्ह ब्रुक्स यांनी धावांचा वेग वाढवताना ७४ चेंडूंत ६२ धावांची भागीदारी केली. होपने ६९ चेंडूंत अर्धशतक पूर्ण केले. पुन्हा एकदा गोलंदाजीत केलेला बदल कामी आला अन् अक्षर पटेलने यजमानांना दुसरा धक्का दिला. ब्रुक्स ३६ चेंडूंत ३५ धावांवर स्लिपमध्ये शिखर धवनच्या हाती झेलबाद झाला. १२७ धावांवर विंडीजचा दुसरा फलंदाज माघारी परतला. युजवेंद्र चहलने पुढील षटकात ब्रेंडन किंगला भोपळ्यावर माघारी जाण्यास भाग पाडले. ३ धावांच्या अंतराने विंडीजचे दोन फलंदाज माघारी परतले.