India vs West Indies 2nd T20I Live Updates : भारतीय फलंदाजांनी आज निराश केले, ओबेड मॅकॉयच्या भेदर माऱ्यापुढे त्यांनी शरणागती पत्करली. मॅकॉयने ४-१-१७-६ अशी अप्रतिम गोलंदाजी केली. त्यानंतर वेस्ट इंडिजने १९.२ षटकांत ५ बाद १४१ धावा करून विजय मिळवला. ब्रेंड किंगने ५२ चेंडूंत ८ चौकार व २ षटकारांच्या मदतीने ६८ धावा केल्या, तर डेव्हॉन थॉमसने १९ चेंडूंत १ चौकार व २ षटकारांसह नाबाद ३१ धावा करून विजयी चौकार खेचला. वेस्ट इंडिजने मालिका १-१ अशी बरोबरीत आणली. ६ विकेट्स घेणाऱ्या मॅकॉयला मॅन ऑफ दी मॅच पुरस्कार दिला.
मॅकॉयने ६वी विकेट घेत इतिहास घडवताना ट्वेंटी-२०त वेस्ट इंडिजकडून सर्वोत्तम गोलंदाजीची नोंद केली. आंतरराष्ट्रीय ट्वेंटी-२० क्रिकेटमधील ही चौथी सर्वोत्तम वैयक्तिक कामगिरी ठरली. या लिस्टमध्ये भारताचा दीपक चहर ( ६-७ वि. बांगलादेश, २०१९), श्रीलंकेचा अजंथा मेंडिस ( ६-८ वि. झिम्बाब्वे, २०१२ व ६-१६ वि. ऑस्ट्रेलिया, २०११), ओबेड मॅकॉय ( ६-१७ वि. भारत, २०२२) आणि युजवेंद्र चहल ( ६-२५ वि. इंग्लंड, २०१७) अशी क्रमवारी आहे. वेस्ट इंडिजकडून ट्वेंटी-२० क्रिकेटमध्ये एकाच सामन्यात सहा विकेट्स घेणारा मॅकॉय पहिलाच गोलंदाज ठरला. किमो पॉल याने बांगलादेशविरुद्ध २०१८मध्ये १५ धावांत ५ विकेट्स घेतल्या होत्या. मॅकॉयने आज सर्वोत्तम गोलंदाजीचा विक्रम केला. डॅरेन सॅम ( ५-२६ वि. झिम्बाब्वे, २०१०) व जेसन होल्डर ( ५-२७ वि इंग्लंड २०२२) यांनी पाच विकेट्स घेतल्या आहेत.