MS Dhoni ला आदर्श मानणारा असं करूच शकत नाही! Hardik Pandya वर नेटिझन्स खवळले 

India vs West Indies 3rd T20I Live Updates : सूर्यकुमार यादव ( Suryakumar Yadav) आणि तिलक वर्मा यांनी भारताचा विजय पक्का केला. वेस्ट इंडिजविरुद्धच्या तिसऱ्या ट्वेंटी-२० सामन्यात भारताने ७ विकेट्स राखून विजय मिळवून मालिकेत १-२ असे कमबॅक केले. सामन्यानंतर नेटिझन्सनी मात्र हार्दिक पांड्याला ( Hardik Pandya) ट्रोल केले. तू महेंद्रसिंग धोनी व विराट कोहली यांना आर्दश मानतोस अन् असं करतोस... अशी टीका नेटिझन्सनी केली.  

कुलदीप यादवने ( ३-२४) आज आंतरराष्ट्रीय ट्वेंटी-२०त सर्वात जलद ५०+ विकेट्स घेणाऱ्या गोलंदाजांत दुसरे स्थान पटकावले. निकोलस पूरन ( २०) आणि ब्रेंडन किंग ( ४२) यांनी चांगला खेळ केला. रोव्हमन पॉवेलने १९ चेंडूंत १ चौकार व ३ षटकारांसह नाबाद ४० धावा केल्या आणि संघाला ५ बाद १५९ धावांपर्यंत पोहोचवले. 

यशस्वी जैस्वाल ( १) व  शुबमन गिल ( ४) अपयशी ठरले. सूर्यकुमार यादव आणि  तिलक वर्मा यांनी चौकार-षटकारांची आतषबाजी करून इरादे स्पष्ट केले. तिलक संयमी खेळ करताना दिसला. सूर्या ४४ चेंडूंत १० चौकार व ४ षटकारांसह ८३ धावांवर माघारी परतला. सूर्याने सेट केलेली मॅच तिलक व हार्दिक पांड्याने पुढे नेली. तिलक ३९ चेंडूंत ४९ धावांवर नाबाद राहिला आणि हार्दिकने नाबाद २० धावा करून विजयी षटकार खेचला. भारताने१७.५ षटकांत ३ बाद १६४ धावा करून सामना जिंकला.  विजयासाठी १८ चेंडूंत ६ धावांची गरज असताना तिलक ४७ धावांवर खेळत होता. १८व्या षटकात हार्दिकने १ धाव घेत तिलकला स्ट्राईक दिली आणि मॅच संपवण्यास सांगितले. पण, तिलकने एक धाव घेतली, हार्दिकने पुन्हा एक धाव घेत त्याला अर्धशतक झळकावण्याची संधी दिली. तिलकला एकच धाव करता आली आणि पुढचा चेंडू हार्दिकने षटकार खेचून विजय निश्चित केला. तिलकला अर्धशतक पूर्ण करू न दिल्याने हार्दिकवर नेटिझन्स भडकले.