IND vs ZIM 1st T20I Live | हरारे : रवी बिश्नोईने आपल्या फिरकीच्या तालावर यजमान संघाला नाचवताना चार बळी घेतले. झिम्बाब्वे दौऱ्यावर असलेल्या भारताच्या युवा ब्रिगेडने सलामीच्या सामन्यातच चमक दाखवली. भारतीय कर्णधार शुबमन गिलने नाणेफेक जिंकून प्रथम गोलंदाजी करण्याचा निर्णय घेतला. मुकेश कुमारने डावाच्या दुसऱ्याच षटकात झिम्बाब्वेला मोठा झटका देत बळी घेतला. त्यानंतर बिश्नोईने प्रतिस्पर्धी संघाच्या फलंदाजीला सुरुंग लावण्याचे काम केले. त्याला वॉशिंग्टन सुंदरने चांगली साथ दिली.
भारताकडून वॉशिंग्टन सुंदरने सर्वाधिक ४ बळी घेतले, त्याने त्याच्या ४ षटकांत अवघ्या १३ धावा देत ही किमया साधली. याशिवाय वॉशिंग्टन सुंदर (२), मुकेश कुमार (१) आणि आवेश खानला (१) बळी घेण्यात यश आले. झिम्बाब्वेकडून वेस्ली मधेवेरे (२१), सिकंदर रझा (१७), ब्रायन बेनेट (२२), डायन मायर्स (२३) आणि क्लाइव्ह मंडेने नाबाद (२९) धावा केल्या. अखेर यजमान संघ निर्धारित २० षटकांत ९ बाद केवळ ११५ धावा करू शकला. भारताला विजयी सलामी देण्यासाठी झिम्बाब्वेने ११६ धावांचे लक्ष्य दिले.
दरम्यान, भारत आणि झिम्बाब्वे यांच्यातील पाच सामन्यांच्या ट्वेंटी-२० मालिकेला आजपासून सुरुवात झाली. सर्व सामने हरारे स्पोर्ट्स क्लब येथे खेळवले जात आहेत. पहिल्या सामन्यातून अभिषेक शर्मा, रियान पराग आणि ध्रुव जुरेल यांनी भारतीय संघात पदार्पण केले. शुबमन गिलच्या नेतृत्वात टीम इंडिया नव्या इनिंगसाठी सज्ज आहे. पाहुण्या टीम इंडियाने सलामीच्या सामन्यात नाणेफेक जिंकून यजमान संघाला प्रथम फलंदाजीसाठी आमंत्रित केले. ट्वेंटी-२० विश्वचषक २०२४ मध्ये खेळलेल्या वरिष्ठ खेळाडूंना या मालिकेतून विश्रांती देण्यात आली आहे. त्यामुळे शुबमन गिलच्या नेतृत्वात भारताची युवा ब्रिगेड मैदानात आहे.
आजच्या सामन्यासाठी भारतीय संघ -
शुबमन गिल (कर्णधार), अभिषेक शर्मा (पदार्पण), ऋतुराज गायकवाड, रियान पराग (पदार्पण), रिंकू सिंग, ध्रुव जुरेल (पदार्पण), वॉशिंग्टन सुंदर, रवी बिश्नोई, आवेश खान, मुकेश कुमार, खलील अहमद.
झिम्बाब्वेचा संघ -
सिकंदर रझा (कर्णधार), तदीवानाशे मारूमानी, इनोसेंट कॅया, ब्रायन बेनेट, डायन मायर्स, जॉनथन कँपबेल, क्लाइव्ह मंडे, वेस्ली मधेवेरे, ल्यूक जोंगवे, ब्लेसिंग मुजारबानी, तेंदई चतारा.
Web Title: IND vs ZIM Live Match Updates Zimbabwe sets Team India a target of 116 runs to win, Ravi Bishnoi takes four wickets
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
