नवी दिल्ली, आयपीएल २०१९ : आयपीएल ही कल्पना ज्यांच्या डोक्यातून आली त्या ललित मोदीने आयपीएलमध्ये पुन्हा फिक्सिंग असल्याचे वक्तव्य केले आहे. मोदीने याबाबत एक ट्विट केले आहे. या ट्विटमध्ये आयपीएलमध्ये फिक्संग होत असल्याचे त्यांनी म्हटले आहे. त्याचबरोबर अधिकाऱ्यांनाही त्यांनी चांगलेच धारेवर धरले आहे.
आयपीएलमध्ये दिल्ली कॅपिटल्स आणि कोलकाता नाईट रायडर्स यांच्यामधील सामन्याचा त्यांनी दाखला आपल्या ट्विटमध्ये दिला आहे. या सामन्यातील एक व्हिडीओ त्यांनी पोस्ट करत त्यावर कमेंट लिहिली आहे. हा व्हिडीओ कोलकाता फलंदाजी करत असतानाचा आहे. कोलकाताचा फलंदाज रॉबिन उथप्पा हा फलंदाजी करत आहे. तर नेपाळचा संदीप लामिचाने हा गोलंदाजी करत आहे. उथप्पा आपला पहिला चेंडू खेळण्यापूर्वी दिल्लीचा यष्टीरक्षक रिषभ पंत हा एक कमेंट करतो आणि या कमेंटमधूनच मॅच फिक्संगचा वास येत असल्याचे मोदीला दाखवून द्यायचे आहे.
हा पाहा व्हिडीओ
उथप्पा फलंदाजीला तयार होण्यापूर्वी पंत, या चेंडूवरही चौकार बसणार आहे, असे या व्हिडीओमध्ये दाखवण्यात आले आहे. चेंडू टाकल्यावर उथप्पानेही चौकार मारल्याचे पाहायला मिळाले आहे. त्यामुळे चेंडू टाकण्यापूर्वी पंतला या चेंडूवर चौकार आहे, हे कसे समजले, असा सवाल मोदीने उपस्थित केला आहे.
मोदीने आपल्या ट्विटमध्ये म्हटले आहे की, " हा जोक आहे कींवा या साऱ्या गोष्टीवर विश्वास बसत नाही. आयपीएल, बीसीसीआय, आयसीसी या साऱ्यांना कधी जाग येणार आहे. अधिकाऱ्यांनाही या गोष्टीची काळजी नसावी, हे लाजीरवाणे आहे."
बीसीसीआचा खुलासाबीसीसीआयने या व्हीडीओबाबत खुलासा केला आहे. बीसीसीआयने म्हटले आहे की, " सोशल मीडियावर जो व्हिडीओ दाखवला जात आहे तो अपूर्ण आहे आणि हेच दुर्देव आहे. पंतने या वाक्यापूर्वी नेमके काय म्हटले आहे, हे या व्हीडीओमध्ये दाखवण्यात आलेले नाही. ती गोष्ट कुणीही ऐकलेली नाही. चौकार वाचवण्यासाठी दिल्लीचा कर्णधार श्रेयस अय्यर हा ऑफ साइडवर क्षेत्ररक्षक वाढवण्यासाठी सांगत असल्याचे या व्हीडीओमध्ये कळत आहे. "