कोलकाता, आयपीएल 2019 : सहाव्या स्थानावरून थेट सलामीला येण्याच्या मिळालेल्या संधीचं सोनं करताना शुबमन गिलने शुक्रवारी अर्धशतकी खेळी केली. कोलकाता नाइट रायडर्सच्या अन्य फलंदाजांना मोठी खेळी करण्यात अपयश आले असले तरी आंद्रे रसेलने पुन्हा आपला इंगा दाखवला. त्याने दिल्ली कॅपिटल्सच्या गोलंदाजांची धुलाई केली. त्यामुळे दिल्ली कॅपिटल्ससमोर त्यांना विजयासाठी 179 धावांचे आव्हान ठेवता आले. शुबमनने आयपीएलमधले दुसरे अर्धशतक झळकावले. रसेलने 21 चेंडूंत 45 धावा केल्या.
जो डेन्लीला पहिल्याच चेंडूवर इशांत शर्माने बाद करताना कोलकाताला पहिला धक्का दिला. सुरुवातीच्या धक्क्यानंतर रॉबीन उथप्पा व शुबमन गिल यांनी कोलकाताला सावरले. दोघांनी पॉवर प्लेमध्ये संघाला 1 बाद 41 असा समाधानकारक पल्ला गाठून दिला. मात्र, 9व्या षटकाच्या चौथ्या चेंडूवर उथप्पाला बाद करण्यात कागिसो रबाडाला यश मिळाले. त्याने टाकलेल्या बाउंसरवर फटका मारण्याच्या नादात उथप्पा यष्टिरक्षक रिषभ पंतच्या हातात झेल देत माघारी परतला. उथप्पाने 30 चेंडूंत 4 चौकार व 1 षटकार खेचून 30 धावा केल्या. दहा षटकांत कोलकाताने 2 बाद 72 धावा केल्या होत्या.
शुबमनने 34 चेंडूंत अर्धशतक पूर्ण केले. आघाडीवर येऊन फलंदाजी करण्याची मिळालेली संधी त्याने हेरली आणि दमदार अर्धशतक झळकावत संघाचा धावफलक हलता ठेवला. नितीश राणाने पुढच्याच चेंडूवर खणखणीत षटकार खेचला, पण त्यानंतर ख्रिस मॉरिसने त्याचा त्रिफळा उडवला. तो 11 धावा करून तंबूत परतला. शुबमनचा झंझावात किमो पॉलने रोखला. शुबमनने 39 चेंडूंत 7 चौकार व 2 षटकार खेचून 65 धावा केल्या. कोलकाताने 15 षटकांत 4 बाद 122 धावा केल्या होत्या. रबाडाने दिल्लीला आणखी एक यश मिळवून दिले. त्याने कोलकाताचा कर्णधार दिनेश कार्तिकला बाद केले. त्यानंतर रसेलने दिल्लीच्या गोलंदाजांवर प्रहार केला. त्याने 21 चेंडूंत 3 चौकार व 4 षटकार खेचून 45 धावा केल्या.
Web Title: IPL 2019 KKR vs DC: Kolkata Knight Riders set 179 runs target to Delhi Capitals
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
