कोलकाता, आयपीएल 2019 : सहाव्या स्थानावरून थेट सलामीला येण्याच्या मिळालेल्या संधीचं सोनं करताना शुबमन गिलने शुक्रवारी अर्धशतकी खेळी केली. कोलकाता नाइट रायडर्सच्या अन्य फलंदाजांना मोठी खेळी करण्यात अपयश आले असले तरी आंद्रे रसेलने पुन्हा आपला इंगा दाखवला. त्याने दिल्ली कॅपिटल्सच्या गोलंदाजांची धुलाई केली. त्यामुळे दिल्ली कॅपिटल्ससमोर त्यांना विजयासाठी 179 धावांचे आव्हान ठेवता आले. शुबमनने आयपीएलमधले दुसरे अर्धशतक झळकावले. रसेलने 21 चेंडूंत 45 धावा केल्या.
जो डेन्लीला पहिल्याच चेंडूवर इशांत शर्माने बाद करताना कोलकाताला पहिला धक्का दिला. सुरुवातीच्या धक्क्यानंतर रॉबीन उथप्पा व शुबमन गिल यांनी कोलकाताला सावरले. दोघांनी पॉवर प्लेमध्ये संघाला 1 बाद 41 असा समाधानकारक पल्ला गाठून दिला. मात्र, 9व्या षटकाच्या चौथ्या चेंडूवर उथप्पाला बाद करण्यात कागिसो रबाडाला यश मिळाले. त्याने टाकलेल्या बाउंसरवर फटका मारण्याच्या नादात उथप्पा यष्टिरक्षक रिषभ पंतच्या हातात झेल देत माघारी परतला. उथप्पाने 30 चेंडूंत 4 चौकार व 1 षटकार खेचून 30 धावा केल्या. दहा षटकांत कोलकाताने 2 बाद 72 धावा केल्या होत्या.